ਆਸਟ੍ਰੇਲੀਅਨ ਓਪਨ ਸਬਾਲੇਨਕਾ, ਮੇਦਵੇਦੇਵ ਅਤੇ ਮਬੋਕੋ ਚੌਥੇ ਦੌਰ ਵਿੱਚ ਦਾਖਲ

ਆਸਟ੍ਰੇਲੀਅਨ ਓਪਨ 2026 ਦੇ ਤੀਜੇ ਦੌਰ ਦੇ ਮੁਕਾਬਲਿਆਂ ਵਿੱਚ ਟਾਪ ਸੀਡ ਆਰੀਆਨਾ ਸਬਾਲੇਨਕਾ, ਮਰਦਾਂ ਦੇ ਵਰਲਡ ਨੰਬਰ-1 ਕਾਰਲੋਸ ਅਲਕਾਰਾਜ਼, ਡੈਨੀਅਲ ਮੇਦਵੇਦੇਵ ਅਤੇ ਵਿਟੋਰੀਆ ਮਬੋਕੋ ਨੇ ਆਪਣੀਆਂ ਜਿੱਤਾਂ ਦਰਜ ਕਰਕੇ ਪ੍ਰੀ-ਕੁਆਰਟਰ ਫਾਈਨਲ ਵਿੱਚ ਜਗ੍ਹਾ ਬਣਾਈ ਹੈ।

ਸਬਾਲੇਨਕਾ ਦੀ ਸਖ਼ਤ ਜਿੱਤ

ਆਰੀਆਨਾ ਸਬਾਲੇਨਕਾ ਨੇ ਇੱਕ ਸਖ਼ਤ ਸੰਘਰਸ਼ ਤੋਂ ਬਾਅਦ ਅਨਾਸਤਾਸੀਆ ਪੋਟਾਪੋਵਾ ਨੂੰ ਹਰਾ ਕੇ ਚੌਥੇ ਦੌਰ ਵਿੱਚ ਪ੍ਰਵੇਸ਼ ਕੀਤਾ। ਸਬਾਲੇਨਕਾ ਨੇ ਇਹ ਮੈਚ 7-6 (4), 7-6 (7) ਦੇ ਸਕੋਰ ਨਾਲ ਜਿੱਤਿਆ। ਪਿਛਲੇ ਚਾਰ ਸਾਲਾਂ ਵਿੱਚ ਆਪਣਾ ਤੀਜਾ ਆਸਟ੍ਰੇਲੀਅਨ ਓਪਨ ਖਿਤਾਬ ਜਿੱਤਣ ਦੀ ਕੋਸ਼ਿਸ਼ ਵਿੱਚ ਲੱਗੀ ਸਬਾਲੇਨਕਾ ਲਈ ਪੋਟਾਪੋਵਾ ਖ਼ਿਲਾਫ਼ ਇਹ ਜਿੱਤ ਆਸਾਨ ਨਹੀਂ ਸੀ। ਪਹਿਲੇ ਸੈੱਟ ਵਿੱਚ ਸਬਾਲੇਨਕਾ 6-5 ਅਤੇ 40-0 ਨਾਲ ਅੱਗੇ ਸੀ, ਪਰ ਪੋਟਾਪੋਵਾ ਨੇ ਤਿੰਨ ਸੈੱਟ ਪੁਆਇੰਟ ਬਚਾ ਕੇ ਖੇਡ ਨੂੰ ਟਾਈਬ੍ਰੇਕਰ ਵਿੱਚ ਖਿੱਚ ਲਿਆ। ਟਾਈਬ੍ਰੇਕਰ ਵਿੱਚ ਵੀ ਸਕੋਰ 3-3 ਨਾਲ ਬਰਾਬਰ ਹੋਣ ਤੋਂ ਬਾਅਦ ਸਬਾਲੇਨਕਾ ਨੇ ਤਜਰਬੇ ਦਾ ਫਾਇਦਾ ਉਠਾਇਆ ਅਤੇ ਬੈਕਹੈਂਡ ਵਿਨਰ ਨਾਲ ਪਹਿਲਾ ਸੈੱਟ ਜਿੱਤਿਆ।

ਦੂਜੇ ਸੈੱਟ ਵਿੱਚ ਕਹਾਣੀ ਹੋਰ ਵੀ ਰੋਮਾਂਚਕ ਰਹੀ। ਪੋਟਾਪੋਵਾ ਇੱਕ ਸਮੇਂ 4-0 ਨਾਲ ਪਿੱਛੇ ਚੱਲ ਰਹੀ ਸੀ, ਪਰ ਉਸਨੇ ਜ਼ੋਰਦਾਰ ਵਾਪਸੀ ਕਰਦੇ ਹੋਏ ਸਕੋਰ 4-4 ਕਰ ਦਿੱਤਾ। ਦੂਜੇ ਟਾਈਬ੍ਰੇਕਰ ਵਿੱਚ ਪੋਟਾਪੋਵਾ ਕੋਲ ਸੈੱਟ ਜਿੱਤਣ ਦੇ ਤਿੰਨ ਮੌਕੇ ਸਨ, ਪਰ ਦਬਾਅ ਦੇ ਪਲਾਂ ਵਿੱਚ ਸਬਾਲੇਨਕਾ ਨੇ ਆਪਣਾ ਸੰਜਮ ਬਣਾਈ ਰੱਖਿਆ ਅਤੇ ਮੈਚ ਆਪਣੇ ਨਾਮ ਕੀਤਾ। ਮੈਚ ਤੋਂ ਬਾਅਦ ਸਬਾਲੇਨਕਾ ਨੇ ਕਿਹਾ, ‘ਪੋਟਾਪੋਵਾ ਨੇ ਅਵਿਸ਼ਵਾਸਯੋਗ ਟੈਨਿਸ ਖੇਡਿਆ। ਮੈਂ ਲਗਭਗ ਪੂਰੇ ਮੈਚ ਵਿੱਚ ਬੈਕਫੁੱਟ ‘ਤੇ ਸੀ। ਖੇਡ ਵਿੱਚ ਕੁਝ ਦਿਨ ਅਜਿਹੇ ਹੁੰਦੇ ਹਨ ਜਦੋਂ ਤੁਹਾਨੂੰ ਬੱਸ ਲੜਨਾ ਹੁੰਦਾ ਹੈ ਅਤੇ ਜਿੱਤ ਲਈ ਜੂਝਣਾ ਪੈਂਦਾ ਹੈ, ਅੱਜ ਦਾ ਦਿਨ ਵੈਸਾ ਹੀ ਸੀ।’ ਹੁਣ ਚੌਥੇ ਦੌਰ ਵਿੱਚ ਉਨ੍ਹਾਂ ਦਾ ਸਾਹਮਣਾ 19 ਸਾਲ ਦੀ ਉਭਰਦੀ ਹੋਈ ਕੈਨੇਡੀਅਨ ਖਿਡਾਰਨ ਵਿਟੋਰੀਆ ਮਬੋਕੋ ਨਾਲ ਹੋਵੇਗਾ।

ਮੇਦਵੇਦੇਵ ਦੀ ਸ਼ਾਨਦਾਰ ਵਾਪਸੀ

ਦੁਨੀਆ ਦੇ 12ਵੇਂ ਨੰਬਰ ਦੇ ਖਿਡਾਰੀ ਡੈਨੀਅਲ ਮੇਦਵੇਦੇਵ ਨੇ ਆਸਟ੍ਰੇਲੀਅਨ ਓਪਨ ਦੇ ਪ੍ਰੀ-ਕੁਆਰਟਰ ਫਾਈਨਲ ਵਿੱਚ ਜਗ੍ਹਾ ਬਣਾਈ ਹੈ। 29 ਸਾਲ ਦੇ ਮੇਦਵੇਦੇਵ ਨੇ ਹੰਗਰੀ ਦੇ ਫਾਬੀਅਨ ਮਾਰੋਜ਼ਸਨ ਨੂੰ ਪੰਜ ਸੈੱਟਾਂ ਦੇ ਸਖ਼ਤ ਮੁਕਾਬਲੇ ਵਿੱਚ 6-7, 4-6, 7-5, 6-0, 6-3 ਨਾਲ ਹਰਾਇਆ। 2024 ਤੋਂ ਬਾਅਦ ਇਹ ਪਹਿਲੀ ਵਾਰ ਹੈ ਜਦੋਂ ਮੇਦਵੇਦੇਵ ਕਿਸੇ ਗ੍ਰੈਂਡ ਸਲੈਮ ਦੇ ਚੌਥੇ ਦੌਰ ਵਿੱਚ ਪਹੁੰਚੇ ਹਨ।

26 ਸਾਲ ਦੇ ਹੰਗਰੀ ਖਿਡਾਰੀ ਮਾਰੋਜ਼ਸਨ ਨੇ ਸ਼ੁਰੂਆਤੀ ਦੋ ਸੈੱਟਾਂ ਵਿੱਚ ਲਗਭਗ ਪਰਫੈਕਟ ਟੈਨਿਸ ਖੇਡਿਆ। ਇੱਕ ਸਮੇਂ ਅਜਿਹਾ ਲੱਗ ਰਿਹਾ ਸੀ ਕਿ ਮੇਦਵੇਦੇਵ ਟੂਰਨਾਮੈਂਟ ਤੋਂ ਬਾਹਰ ਹੋ ਜਾਣਗੇ, ਪਰ ਤਿੰਨ ਘੰਟੇ ਤੋਂ ਵੱਧ ਚੱਲੇ ਇਸ ਮੈਚ ਵਿੱਚ ਰੂਸੀ ਖਿਡਾਰੀ ਨੇ ਆਪਣਾ ਸਬਰ ਨਹੀਂ ਗੁਆਇਆ। ਤੀਜਾ ਸੈੱਟ ਨੇੜਲੇ ਫ਼ਰਕ ਨਾਲ ਜਿੱਤਣ ਤੋਂ ਬਾਅਦ ਮੈਚ ਦੀ ਪੂਰੀ ਲੈਅ ਮੇਦਵੇਦੇਵ ਦੇ ਪੱਖ ਵਿੱਚ ਮੁੜ ਗਈ। ਚੌਥੇ ਸੈੱਟ ਦੀ ਸ਼ੁਰੂਆਤ ਵਿੱਚ ਹੀ ਫਾਬੀਅਨ ਮਾਰੋਜ਼ਸਨ ਨੇ ਥਕਾਵਟ ਦੇ ਸੰਕੇਤ ਦੇਣੇ ਸ਼ੁਰੂ ਕਰ ਦਿੱਤੇ ਸਨ। ਮੇਦਵੇਦੇਵ ਨੇ ਇਸ ਦਾ ਪੂਰਾ ਫਾਇਦਾ ਉਠਾਇਆ ਅਤੇ ਸਿਰਫ਼ 19 ਮਿੰਟ ਵਿੱਚ ਚੌਥਾ ਸੈੱਟ 6-0 ਨਾਲ ਆਪਣੇ ਨਾਮ ਕਰ ਲਿਆ। ਪੰਜਵੇਂ ਅਤੇ ਫ਼ੈਸਲਾਕੁੰਨ ਸੈੱਟ ਵਿੱਚ ਮੇਦਵੇਦੇਵ ਪੂਰੀ ਤਰ੍ਹਾਂ ਹਾਵੀ ਰਹੇ ਅਤੇ 2026 ਸੀਜ਼ਨ ਦੀ ਆਪਣੀ ਲਗਾਤਾਰ 8ਵੀਂ ਜਿੱਤ ਦਰਜ ਕੀਤੀ।

ਮੈਚ ਤੋਂ ਬਾਅਦ ਮੇਦਵੇਦੇਵ ਨੇ ਆਪਣੀ ਰਿਕਵਰੀ ਬਾਰੇ ਦੱਸਦਿਆਂ ਕਿਹਾ, ‘ਮੈਂ ਕ੍ਰੈਂਪ (ਮਾਸਪੇਸ਼ੀਆਂ ਵਿੱਚ ਖਿੱਚ) ਤੋਂ ਬਚਣ ਲਈ ਥੋੜ੍ਹਾ ਅਚਾਰ ਦਾ ਜੂਸ (Pickle Juice) ਪੀਤਾ। ਇਹ ਬਹੁਤ ਮੁਸ਼ਕਲ ਮੈਚ ਸੀ। ਪਿਛਲੇ ਸਾਲ ਮੈਂ ਲਗਭਗ ਸਾਰੇ ਪੰਜ ਸੈੱਟ ਵਾਲੇ ਮੈਚ ਹਾਰ ਗਿਆ ਸੀ, ਪਰ ਇਸ ਵਾਰ ਮੈਂ ਇਸ ਨੂੰ ਪਲਟ ਦਿੱਤਾ। ਮੈਂ ਪਹਿਲੇ ਦੋ ਸੈੱਟਾਂ ਵਿੱਚ ਵੀ ਬੁਰਾ ਨਹੀਂ ਖੇਡ ਰਿਹਾ ਸੀ, ਇਸ ਲਈ ਮੈਂ ਖੁਦ ਨੂੰ ਸ਼ਾਂਤ ਰੱਖਿਆ।’ ਹੁਣ ਚੌਥੇ ਦੌਰ ਵਿੱਚ ਮੇਦਵੇਦੇਵ ਦਾ ਸਾਹਮਣਾ 20 ਸਾਲ ਦੇ ਅਮਰੀਕੀ ਖਿਡਾਰੀ ਅਤੇ 25ਵੀਂ ਸੀਡ ਲਰਨਰ ਟਿਏਨ ਨਾਲ ਹੋਵੇਗਾ, ਜਿਸ ਨੇ 2025 ਵਿੱਚ ਮੇਦਵੇਦੇਵ ਨੂੰ ਹਰਾਇਆ ਸੀ।

ਮਬੋਕੋ ਦਾ ਪਹਿਲਾ ਗ੍ਰੈਂਡ ਸਲੈਮ ਪ੍ਰੀ-ਕੁਆਰਟਰ ਫਾਈਨਲ

ਕੈਨੇਡਾ ਦੀ 19 ਸਾਲ ਦੀ ਵਿਟੋਰੀਆ ਮਬੋਕੋ ਲਈ 23 ਜਨਵਰੀ ਦਾ ਦਿਨ ਇਤਿਹਾਸਕ ਰਿਹਾ। ਉਨ੍ਹਾਂ ਨੇ ਕਲਾਰਾ ਟੌਸਨ ਨੂੰ ਤਿੰਨ ਸੈੱਟਾਂ ਦੇ ਮੁਕਾਬਲੇ ਵਿੱਚ 7-6(5), 5-7, 6-3 ਨਾਲ ਹਰਾ ਕੇ ਪਹਿਲੀ ਵਾਰ ਕਿਸੇ ਗ੍ਰੈਂਡ ਸਲੈਮ ਦੇ ਚੌਥੇ ਦੌਰ ਵਿੱਚ ਜਗ੍ਹਾ ਬਣਾਈ ਹੈ। ਦੂਜੇ ਸੈੱਟ ਵਿੱਚ ਕਈ ਮੌਕੇ ਗੁਆਉਣ ਤੋਂ ਬਾਅਦ ਮਬੋਕੋ ਨੇ ਤੀਜੇ ਅਤੇ ਫ਼ੈਸਲਾਕੁੰਨ ਸੈੱਟ ਵਿੱਚ ਆਪਣੀ ਲੈਅ ਵਾਪਸ ਪਾ ਲਈ। ਉਨ੍ਹਾਂ ਨੇ ਲਗਾਤਾਰ ਤਿੰਨ ਗੇਮ ਜਿੱਤ ਕੇ 4-1 ਦੀ ਬੜ੍ਹਤ ਬਣਾਈ। ਮਬੋਕੋ ਨੇ ਆਪਣੀ ਇਸ ਜਿੱਤ ‘ਤੇ ਕਿਹਾ, ‘ਇਹ ਸਭ ਖੁਦ ‘ਤੇ ਵਿਸ਼ਵਾਸ ਦਾ ਨਤੀਜਾ ਹੈ। ਮੈਂ ਪਹਿਲੀ ਵਾਰ ਇੱਥੇ ਖੇਡ ਰਹੀ ਹਾਂ ਅਤੇ ਚੌਥੇ ਦੌਰ ਵਿੱਚ ਪਹੁੰਚ ਕੇ ਬਹੁਤ ਖੁਸ਼ ਹਾਂ।’