ਜਿਓ IPO ਦੀ ਪ੍ਰਕਿਰਿਆ ਅਧਿਕਾਰਕ ਤੌਰ ‘ਤੇ ਸ਼ੁਰੂ
ਰਿਲਾਇੰਸ ਇੰਡਸਟਰੀਜ਼ ਦੇ ਚੇਅਰਮੈਨ ਮੁਕੇਸ਼ ਅੰਬਾਨੀ ਨੇ ਕੰਪਨੀ ਦੀ 49ਵੀਂ ਸਾਲਾਨਾ ਜਨਰਲ ਮੀਟਿੰਗ (AGM) ਦੌਰਾਨ ਜਿਓ IPO ਬਾਰੇ ਸਭ ਤੋਂ ਵੱਡਾ ਐਲਾਨ ਕੀਤਾ। ਉਨ੍ਹਾਂ ਦੱਸਿਆ ਕਿ ਜਿਓ ਦੇ IPO ਲਈ ਡਰਾਫਟ ਰੈੱਡ ਹੈਰਿੰਗ ਪ੍ਰੋਸਪੈਕਟਸ (DRHP) ਨੂੰ ਮਨਜ਼ੂਰੀ ਮਿਲ ਚੁੱਕੀ ਹੈ ਅਤੇ ਇਸ ਨੂੰ ਸੇਬੀ (SEBI) ਕੋਲ ਦਾਖਲ ਕੀਤਾ ਜਾ ਰਿਹਾ ਹੈ। ਇਸ ਐਲਾਨ ਨਾਲ ਭਾਰਤ ਦੀ ਸਭ ਤੋਂ ਵੱਡੀ ਟੈਲੀਕਾਮ ਅਤੇ ਡਿਜੀਟਲ ਸੇਵਾਵਾਂ ਕੰਪਨੀ ਜਿਓ ਦੇ ਸ਼ੇਅਰ ਬਾਜ਼ਾਰ ਵਿੱਚ ਲਿਸਟ ਹੋਣ ਦੀ ਪ੍ਰਕਿਰਿਆ ਅਧਿਕਾਰਕ ਤੌਰ ‘ਤੇ ਸ਼ੁਰੂ ਹੋ ਗਈ ਹੈ। ਮਾਰਕੀਟ ਮਾਹਿਰਾਂ ਦਾ ਮੰਨਣਾ ਹੈ ਕਿ ਇਹ ਭਾਰਤ ਦੇ ਇਤਿਹਾਸ ਦੇ ਸਭ ਤੋਂ ਵੱਡੇ IPO ਵਿੱਚੋਂ ਇੱਕ ਹੋ ਸਕਦਾ ਹੈ।
ਰਿਲਾਇੰਸ ਲਈ ਇਤਿਹਾਸਕ ਸਾਲ
ਮੁਕੇਸ਼ ਅੰਬਾਨੀ ਨੇ FY2026 ਨੂੰ ਰਿਲਾਇੰਸ ਗਰੁੱਪ ਲਈ ਇੱਕ ਇਤਿਹਾਸਕ ਸਾਲ ਦੱਸਿਆ। ਉਨ੍ਹਾਂ ਕਿਹਾ ਕਿ ਰਿਲਾਇੰਸ ਜਿਓ ਨੇ ਆਪਣੇ 10 ਸਾਲ ਪੂਰੇ ਕਰ ਲਏ ਹਨ, ਜਦਕਿ ਰਿਲਾਇੰਸ ਰਿਟੇਲ ਨੇ 20 ਸਾਲਾਂ ਦਾ ਸਫ਼ਰ ਤੈਅ ਕਰ ਲਿਆ ਹੈ। ਪਿਛਲੇ ਦਹਾਕੇ ਦੌਰਾਨ ਜਿਓ ਇੱਕ ਆਮ ਟੈਲੀਕਾਮ ਕੰਪਨੀ ਤੋਂ ਵਿਸ਼ਵ ਪੱਧਰੀ ਡਿਜੀਟਲ ਪਲੇਟਫਾਰਮ ਬਣ ਗਈ ਹੈ। ਇਸ ਦੇ ਨਾਲ ਹੀ ਰਿਲਾਇੰਸ ਰਿਟੇਲ ਭਾਰਤ ਦੀ ਸਭ ਤੋਂ ਵੱਡੀ ਰਿਟੇਲ ਚੇਨ ਵਜੋਂ ਉਭਰੀ ਹੈ।
ਨਵੀਨਤਾ ਅਤੇ ਆਤਮਨਿਰਭਰਤਾ ‘ਤੇ ਖਾਸ ਧਿਆਨ
ਅੰਬਾਨੀ ਨੇ ਕਿਹਾ ਕਿ ਰਿਲਾਇੰਸ ਭਾਰਤ ਨੂੰ ਆਤਮਨਿਰਭਰ ਬਣਾਉਣ ਦੇ ਟੀਚੇ ਨੂੰ ਸਹਿਯੋਗ ਦੇਣ ਲਈ ਨਵੀਨਤਾ, ਖੋਜ ਅਤੇ ਤਕਨਾਲੋਜੀ ਵਿੱਚ ਵੱਡੇ ਪੱਧਰ ‘ਤੇ ਨਿਵੇਸ਼ ਕਰ ਰਹੀ ਹੈ। ਉਨ੍ਹਾਂ ਦੱਸਿਆ ਕਿ ਜਿਓ ਨੇ ਗਲੋਬਲ ਇਨੋਵੇਸ਼ਨ ਰੈਂਕਿੰਗ ਵਿੱਚ ਸ਼ਾਨਦਾਰ ਛਾਲ ਮਾਰੀ ਹੈ। ਸਿਰਫ਼ ਇੱਕ ਸਾਲ ਵਿੱਚ ਕੰਪਨੀ ਦੀ ਰੈਂਕਿੰਗ 340ਵੇਂ ਸਥਾਨ ਤੋਂ 20ਵੇਂ ਸਥਾਨ ਤੱਕ ਪਹੁੰਚ ਗਈ ਹੈ। ਇਹ ਕੰਪਨੀ ਦੀ ਖੋਜ ਅਤੇ ਪੇਟੈਂਟ ਵਿਕਾਸ ਸਮਰੱਥਾ ਨੂੰ ਦਰਸਾਉਂਦਾ ਹੈ।
ਰਿਲਾਇੰਸ ਦਾ ਰਿਕਾਰਡ ਵਿੱਤੀ ਪ੍ਰਦਰਸ਼ਨ
ਰਿਲਾਇੰਸ ਇੰਡਸਟਰੀਜ਼ ਨੇ FY2026 ਵਿੱਚ ਆਪਣਾ ਸਭ ਤੋਂ ਵਧੀਆ ਵਿੱਤੀ ਪ੍ਰਦਰਸ਼ਨ ਦਰਜ ਕੀਤਾ। ਕੰਪਨੀ ਦੀ ਕੁੱਲ ਆਮਦਨ ₹11,75,919 ਕਰੋੜ ਰਹੀ, ਜੋ ਪਿਛਲੇ ਸਾਲ ਦੇ ਮੁਕਾਬਲੇ ਲਗਭਗ 9.8 ਫੀਸਦੀ ਵੱਧ ਹੈ। EBITDA ₹2,07,911 ਕਰੋੜ ਅਤੇ ਸ਼ੁੱਧ ਮੁਨਾਫ਼ਾ ₹95,754 ਕਰੋੜ ਰਹੀਾ, ਜਿਸ ਵਿੱਚ 17.8 ਫੀਸਦੀ ਦਾ ਵਾਧਾ ਦਰਜ ਕੀਤਾ ਗਿਆ। ਰਿਟੇਲ ਅਤੇ ਡਿਜੀਟਲ ਕਾਰੋਬਾਰਾਂ ਨੇ ਮਿਲ ਕੇ ਕੰਪਨੀ ਦੇ EBITDA ਦਾ ਲਗਭਗ ਅੱਧਾ ਹਿੱਸਾ ਯੋਗਦਾਨ ਦਿੱਤਾ, ਜੋ ਰਿਲਾਇੰਸ ਦੀ ਵਿਭਿੰਨਤਾ ਵਾਲੀ ਵਿਕਾਸ ਰਣਨੀਤੀ ਨੂੰ ਦਰਸਾਉਂਦਾ ਹੈ।
ਨਿਰਯਾਤ ਅਤੇ CSR ਵਿੱਚ ਨਵੀਆਂ ਉੱਚਾਈਆਂ
FY2026 ਦੌਰਾਨ ਰਿਲਾਇੰਸ ਦਾ ਨਿਰਯਾਤ ₹2,78,808 ਕਰੋੜ ਰਿਹਾ, ਜੋ ਭਾਰਤ ਦੇ ਕੁੱਲ ਮਾਲ ਨਿਰਯਾਤ ਦਾ ਲਗਭਗ 6.7 ਫੀਸਦੀ ਹੈ। ਕੰਪਨੀ ਨੇ CSR ਗਤੀਵਿਧੀਆਂ ‘ਤੇ ₹2,248 ਕਰੋੜ ਖਰਚ ਕੀਤੇ, ਜਿਸ ਨੂੰ ਅੰਬਾਨੀ ਨੇ ਕਿਸੇ ਵੀ ਭਾਰਤੀ ਕੰਪਨੀ ਵੱਲੋਂ ਸਭ ਤੋਂ ਵੱਡਾ ਸਮਾਜਿਕ ਯੋਗਦਾਨ ਦੱਸਿਆ।
ਹੁਣ ਨਿਵੇਸ਼ਕਾਂ ਦੀ ਨਜ਼ਰ ਕਿਸ ‘ਤੇ ਹੋਵੇਗੀ?
DRHP ਦਾਖਲ ਹੋਣ ਤੋਂ ਬਾਅਦ ਹੁਣ ਨਿਵੇਸ਼ਕ IPO ਦੇ ਆਕਾਰ, ਮੁੱਲਾਂਕਣ, ਸ਼ੇਅਰ ਅਲਾਟਮੈਂਟ ਅਤੇ ਲਿਸਟਿੰਗ ਸਮੇਂ ਬਾਰੇ ਹੋਰ ਜਾਣਕਾਰੀ ਦੀ ਉਡੀਕ ਕਰਨਗੇ। ਜਿਓ IPO ਭਾਰਤੀ ਪੂੰਜੀ ਬਾਜ਼ਾਰ ਲਈ ਇੱਕ ਇਤਿਹਾਸਕ ਘਟਨਾ ਸਾਬਤ ਹੋ ਸਕਦੀ ਹੈ ਅਤੇ ਇਹ ਟੈਲੀਕਾਮ ਅਤੇ ਤਕਨਾਲੋਜੀ ਸੈਕਟਰ ਵਿੱਚ ਨਿਵੇਸ਼ਕਾਂ ਦੀ ਰੁਚੀ ਨੂੰ ਹੋਰ ਵਧਾ ਸਕਦੀ ਹੈ।
