ਆਸਟ੍ਰੇਲੀਆਈ ਆਨਲਾਈਨ ਸੁਰੱਖਿਆ ਰੈਗੂਲੇਟਰ ਵੱਲੋਂ ਅਦਾਲਤੀ ਕਾਰਵਾਈ
ਡਿਜੀਟਲ ਪਲੇਟਫਾਰਮਾਂ ‘ਤੇ ਨਕੇਲ ਕੱਸਣ ਲਈ ਆਸਟ੍ਰੇਲੀਆਈ ਸਰਕਾਰ ਨੇ ਇੱਕ ਵੱਡਾ ਕਦਮ ਚੁੱਕਦੇ ਹੋਏ ਮਸ਼ਹੂਰ ਮੈਸੇਜਿੰਗ ਐਪ ਟੈਲੀਗ੍ਰਾਮ (Telegram) ਵਿਰੁੱਧ ਕਾਨੂੰਨੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਆਸਟ੍ਰੇਲੀਆ ਦੇ ‘ਈ-ਸੇਫਟੀ ਕਮਿਸ਼ਨਰ’ (eSafety Commissioner) ਜੂਲੀ ਇਨਮੈਨ ਗ੍ਰਾਂਟ ਨੇ ਦੇਸ਼ ਦੀ ਫੈਡਰਲ ਅਦਾਲਤ ਵਿੱਚ ਟੈਲੀਗ੍ਰਾਮ ਖਿਲਾਫ ਦੀਵਾਨੀ ਮੁਕੱਦਮਾ ਦਰਜ ਕਰਵਾਇਆ ਹੈ। ਰੈਗੂਲੇਟਰ ਦਾ ਦੋਸ਼ ਹੈ ਕਿ ਟੈਲੀਗ੍ਰਾਮ ਨੇ ਦੇਸ਼ ਦੇ ‘ਆਨਲਾਈਨ ਸੇਫਟੀ ਐਕਟ 2021’ ਦੇ ਨਿਯਮਾਂ ਦੀ ਸ਼ਰੇਆਮ ਉਲੰਘਣਾ ਕੀਤੀ ਹੈ। ਐਪ ਨੇ ਆਸਟ੍ਰੇਲੀਆਈ ਵਰਤੋਂਕਾਰਾਂ ਦੀਆਂ ਸ਼ਿਕਾਇਤਾਂ ਦੇ ਬਾਵਜੂਦ ਅੱਤਵਾਦੀ ਹਮਲਿਆਂ, ਸਮੂਹਿਕ ਗੋਲੀਬਾਰੀ ਅਤੇ ਹਿੰਸਕ ਪ੍ਰਚਾਰ ਦੀਆਂ ਵੀਡੀਓਜ਼ ਨੂੰ ਆਪਣੇ ਪਲੇਟਫਾਰਮ ਤੋਂ ਨਹੀਂ ਹਟਾਇਆ। ਜੇਕਰ ਦੋਸ਼ ਸਿੱਧ ਹੁੰਦੇ ਹਨ ਤਾਂ ਟੈਲੀਗ੍ਰਾਮ ‘ਤੇ 54.6 ਮਿਲੀਅਨ ਆਸਟ੍ਰੇਲੀਆਈ ਡਾਲਰ (ਲਗਭਗ 38 ਮਿਲੀਅਨ ਅਮਰੀਕੀ ਡਾਲਰ) ਦਾ ਭਾਰੀ ਜੁਰਮਾਨਾ ਲਗਾਇਆ ਜਾ ਸਕਦਾ ਹੈ।
ਅੱਤਵਾਦੀ ਸਮੱਗਰੀ ਅਤੇ ਵੀਡੀਓਜ਼ ਹਟਾਉਣ ਵਿੱਚ ਦੇਰੀ
ਅਦਾਲਤ ਵਿੱਚ ਦਾਖਲ ਕੀਤੇ ਗਏ ਦਸਤਾਵੇਜ਼ਾਂ ਮੁਤਾਬਕ ਟੈਲੀਗ੍ਰਾਮ ‘ਤੇ ਕੰਟੈਂਟ ਮੋਡਰੇਸ਼ਨ (ਸਮੱਗਰੀ ਦੀ ਜਾਂਚ) ਵਿੱਚ ਵੱਡੀਆਂ ਖਾਮੀਆਂ ਪਾਈਆਂ ਗਈਆਂ ਹਨ। ਜੁਲਾਈ ਤੋਂ ਅਕਤੂਬਰ 2025 ਦਰਮਿਆਨ ਆਸਟ੍ਰੇਲੀਆਈ ਯੂਜ਼ਰਸ ਨੇ ਅੱਤਵਾਦੀ ਸਮੱਗਰੀ ਵਾਲੀਆਂ 12 ਪੋਸਟਾਂ ਬਾਰੇ ਰਿਪੋਰਟ ਕੀਤੀ ਸੀ। ਅਧਿਕਾਰੀਆਂ ਵੱਲੋਂ ਸੂਚਿਤ ਕੀਤੇ ਜਾਣ ਦੇ ਬਾਵਜੂਦ ਟੈਲੀਗ੍ਰਾਮ ਨੇ 10 ਪੋਸਟਾਂ ਨੂੰ ਨਹੀਂ ਹਟਾਇਆ ਅਤੇ ਨਾ ਹੀ ਉਨ੍ਹਾਂ ਖਾਤਿਆਂ ਨੂੰ ਬਲਾਕ ਕੀਤਾ ਜੋ ਇਹ ਹਿੰਸਕ ਵੀਡੀਓਜ਼ ਸ਼ੇਅਰ ਕਰ ਰਹੇ ਸਨ। ਕਈ ਮਾਮਲਿਆਂ ਵਿੱਚ ਇਹ ਖਤਰਨਾਕ ਵੀਡੀਓਜ਼ ਤਿੰਨ ਹਫ਼ਤਿਆਂ ਤੱਕ ਐਪ ‘ਤੇ ਮੌਜੂਦ ਰਹੀਆਂ।
ਇਸ ਤੋਂ ਵੀ ਵੱਡੀ ਲਾਪਰਵਾਹੀ ਇਹ ਸਾਹਮਣੇ ਆਈ ਕਿ 2019 ਵਿੱਚ ਨਿਊਜ਼ੀਲੈਂਡ ਦੇ ਕ੍ਰਾਈਸਟਚਰਚ ਮਸਜਿਦ ਹਮਲੇ ਅਤੇ 2022 ਵਿੱਚ ਅਮਰੀਕਾ ਦੇ ਬਫੈਲੋ ਸੁਪਰਮਾਰਕੀਟ ਗੋਲੀਬਾਰੀ ਦੀਆਂ ਲਾਈਵ ਵੀਡੀਓਜ਼ ਲਗਭਗ ਤਿੰਨ ਮਹੀਨਿਆਂ ਤੱਕ ਟੈਲੀਗ੍ਰਾਮ ‘ਤੇ ਉਪਲਬਧ ਰਹੀਆਂ। ਰੈਗੂਲੇਟਰ ਨੇ ਕਿਹਾ ਕਿ ਟੈਲੀਗ੍ਰਾਮ ਦੀਆਂ ਸੇਵਾ ਸ਼ਰਤਾਂ ਆਪਣੇ ਵੱਡੇ ਜਨਤਕ ਚੈਨਲਾਂ ‘ਤੇ ਅੱਤਵਾਦੀ ਪ੍ਰਚਾਰ ਨੂੰ ਪੂਰੀ ਤਰ੍ਹਾਂ ਰੋਕਣ ਵਿੱਚ ਅਸਮਰੱਥ ਰਹੀਆਂ ਹਨ।
ਗਲੋਬਲ ਦਬਾਅ ਅਤੇ ਟੈਲੀਗ੍ਰਾਮ ਦਾ ਪੱਖ
ਇਹ ਮੁਕੱਦਮਾ ਅਜਿਹੇ ਸਮੇਂ ‘ਚ ਦਰਜ ਕੀਤਾ ਗਿਆ ਹੈ ਜਦੋਂ ਪੂਰੀ ਦੁਨੀਆ ਵਿੱਚ ਟੈਲੀਗ੍ਰਾਮ ‘ਤੇ ਕਾਨੂੰਨੀ ਸ਼ਿਕੰਜਾ ਕੱਸਿਆ ਜਾ ਰਿਹਾ ਹੈ। ਟੈਲੀਗ੍ਰਾਮ ਦੇ ਸੰਸਥਾਪਕ ਪਾਵੇਲ ਦੁਰੋਵ (Pavel Durov) ਨੂੰ ਪਿਛਲੇ ਸਾਲ ਫਰਾਂਸ ਵਿੱਚ ਗੈਰ-ਕਾਨੂੰਨੀ ਗਤੀਵਿਧੀਆਂ ਅਤੇ ਨਸ਼ਾ ਤਸਕਰੀ ‘ਤੇ ਰੋਕ ਨਾ ਲਗਾਉਣ ਦੇ ਦੋਸ਼ਾਂ ਹੇਠ ਗ੍ਰਿਫਤਾਰ ਕੀਤਾ ਗਿਆ ਸੀ। ਹਾਲਾਂਕਿ, ਟੈਲੀਗ੍ਰਾਮ ਨੇ ਆਸਟ੍ਰੇਲੀਆਈ ਅਦਾਲਤ ਦੇ ਇਨ੍ਹਾਂ ਦੋਸ਼ਾਂ ਨੂੰ ਪੂਰੀ ਤਰ੍ਹਾਂ ਨਕਾਰ ਦਿੱਤਾ ਹੈ।
ਟੈਲੀਗ੍ਰਾਮ ਦੇ ਬੁਲਾਰੇ ਨੇ ਕਿਹਾ ਕਿ ਕੰਪਨੀ ਅਦਾਲਤ ਵਿੱਚ ਇਨ੍ਹਾਂ ਦੋਸ਼ਾਂ ਦਾ ਡਟ ਕੇ ਮੁਕਾਬਲਾ ਕਰੇਗੀ। ਕੰਪਨੀ ਮੁਤਾਬਕ ਉਨ੍ਹਾਂ ਦੀ ਅੱਤਵਾਦ ਵਿਰੋਧੀ ਨੀਤੀ ਬਹੁਤ ਸਖ਼ਤ ਹੈ ਅਤੇ ਸਾਲ 2026 ਵਿੱਚ ਹੀ ਉਨ੍ਹਾਂ ਨੇ 1,50,000 ਤੋਂ ਵੱਧ ਅੱਤਵਾਦ ਨਾਲ ਜੁੜੇ ਗਰੁੱਪਾਂ ਅਤੇ ਚੈਨਲਾਂ ਨੂੰ ਬਲਾਕ ਕੀਤਾ ਹੈ। ਕੰਪਨੀ ਨੇ ਦਾਅਵਾ ਕੀਤਾ ਕਿ ਉਹ ਵਰਤੋਂਕਾਰਾਂ ਦੀ ਪ੍ਰਾਈਵੇਸੀ ਅਤੇ ਬੋਲਣ ਦੀ ਆਜ਼ਾਦੀ ਦੀ ਰੱਖਿਆ ਲਈ ਵਚਨਬੱਧ ਹੈ।
ਟੈਕਨਾਲੋਜੀ ਕੰਪਨੀਆਂ ਲਈ ਵੱਡੀ ਚੇਤਾਵਨੀ
ਆਸਟ੍ਰੇਲੀਆ ਦੀ ਸੰਚਾਰ ਮੰਤਰੀ ਅਨੀਕਾ ਵੈਲਸ ਨੇ ਸਪੱਸ਼ਟ ਕੀਤਾ ਹੈ ਕਿ ਸਰਕਾਰ ਅਜਿਹੀਆਂ ਤਕਨਾਲੋਜੀ ਕੰਪਨੀਆਂ ਨੂੰ ਬਿਲਕੁਲ ਬਰਦਾਸ਼ਤ ਨਹੀਂ ਕਰੇਗੀ ਜੋ ਆਪਣੇ ਪਲੇਟਫਾਰਮ ‘ਤੇ ਹਿੰਸਕ ਅਤੇ ਅੱਤਵਾਦੀ ਸਮੱਗਰੀ ਨੂੰ ਬੜਾਵਾ ਦਿੰਦੀਆਂ ਹਨ। ਇਸ ਕਾਨੂੰਨੀ ਲੜਾਈ ‘ਤੇ ਪੂਰੀ ਦੁਨੀਆ ਦੀਆਂ ਨਜ਼ਰਾਂ ਟਿਕੀਆਂ ਹੋਈਆਂ ਹਨ ਕਿਉਂਕਿ ਇਸ ਦਾ ਫੈਸਲਾ ਆਉਣ ਵਾਲੇ ਸਮੇਂ ਵਿੱਚ ਸੋਸ਼ਲ ਮੀਡੀਆ ਅਤੇ ਮੈਸੇਜਿੰਗ ਐਪਸ ਦੀ ਜਵਾਬਦੇਹੀ ਤੈਅ ਕਰੇਗਾ।
