ਜਰਮਨੀ ਦੀ ਮਸ਼ਹੂਰ ਲਗਜ਼ਰੀ ਕਾਰ ਨਿਰਮਾਤਾ ਕੰਪਨੀ ਪੋਰਸ਼ (Porsche) ਨੇ ਇੱਕ ਵੱਡਾ ਕਦਮ ਚੁੱਕਦਿਆਂ ਸਾਲ 2030 ਤੱਕ ਲਗਭਗ 9,000 ਨੌਕਰੀਆਂ ਖਤਮ ਕਰਨ ਦਾ ਐਲਾਨ ਕੀਤਾ ਹੈ। ਕੰਪਨੀ ਦਾ ਇਹ ਵਿਆਪਕ ਰੁਝਾਨ ਅਤੇ ਪੁਨਰਗਠਨ ਯੋਜਨਾ ਗਲੋਬਲ ਪੱਧਰ ‘ਤੇ ਕੁੱਲ ਕਰਮਚਾਰੀਆਂ ਦਾ ਲਗਭਗ 25 ਫੀਸਦੀ ਹਿੱਸਾ ਹੈ। ਪਹਿਲਾਂ ਐਲਾਨੇ ਗਏ ਉਪਾਵਾਂ ਨੂੰ ਮਿਲਾ ਕੇ ਇਹ ਕਟੌਤੀ 30 ਫੀਸਦੀ ਤੱਕ ਜਾ ਸਕਦੀ ਹੈ। ਆਟੋਮੋਬਾਈਲ ਸੈਕਟਰ ਵਿੱਚ ਆਈਆਂ ਆਰਥਿਕ ਚੁਣੌਤੀਆਂ, ਚੀਨ ਵਿੱਚ ਡਿੱਗਦੀ ਮੰਗ, ਅਮਰੀਕੀ ਟੈਰਿਫ ਅਤੇ ਇਲੈਕਟ੍ਰਿਕ ਵਹੀਕਲ (EV) ਰਣਨੀਤੀ ਦੀ ਬਦਲਦੀ ਲਾਗਤ ਕਾਰਨ ਕੰਪਨੀ ਨੂੰ ਇਹ ਸਖ਼ਤ ਫੈਸਲਾ ਲੈਣਾ ਪਿਆ ਹੈ।
ਉਤਪਾਦਨ ਤੋਂ ਵੱਧ ਮੁਨਾਫ਼ੇ ‘ਤੇ ਧਿਆਨ
ਪਿਛਲੇ ਕਈ ਸਾਲਾਂ ਤੋਂ ਪੋਰਸ਼ ਆਪਣੇ ਉਤਪਾਦਨ ਅਤੇ ਵਿਕਰੀ ਦੇ ਦਾਇਰੇ ਨੂੰ ਲਗਾਤਾਰ ਵਧਾ ਰਿਹਾ ਸੀ। ਪਰ ਹੁਣ ਕੰਪਨੀ ਨੇ ਆਪਣੀ ਨੀਤੀ ਵਿੱਚ ਵੱਡਾ ਬਦਲਾਅ ਕਰਦਿਆਂ “ਵਾਲੀਅਮ ਨਾਲੋਂ ਮੁੱਲ” (Value over Volume) ਦੀ ਨੀਤੀ ਅਪਣਾਉਣ ਦਾ ਫੈਸਲਾ ਕੀਤਾ ਹੈ। ਕੰਪਨੀ ਦੇ ਸੀਈਓ ਮਾਈਕਲ ਲੀਟਰਜ਼ ਅਨੁਸਾਰ, ਹੁਣ ਜ਼ਿਆਦਾ ਗੱਡੀਆ ਵੇਚਣ ਦੀ ਦੌੜ ਦੀ ਬਜਾਏ ਉੱਚੇ ਮੁੱਲ ਅਤੇ ਬਿਹਤਰ ਮਾਰਜਿਨ ਵਾਲੇ ਲਗਜ਼ਰੀ ਵਾਹਨਾਂ ‘ਤੇ ਧਿਆਨ ਕੇਂਦਰਿਤ ਕੀਤਾ ਜਾਵੇਗਾ। ਪਿਛਲੇ ਸਾਲ ਕੰਪਨੀ ਦਾ ਮੁਨਾਫ਼ਾ ਮਾਰਜਿਨ ਡਿੱਗ ਕੇ ਸਿਰਫ਼ 1.1 ਫੀਸਦੀ ਰਹਿ ਗਿਆ ਸੀ, ਜੋ ਕਿ 2023 ਵਿੱਚ 18 ਫੀਸਦੀ ਸੀ। ਨਵੀਂ ਰਣਨੀਤੀ ਤਹਿਤ ਕੰਪਨੀ ਦਾ ਟੀਚਾ ਸਾਲਾਨਾ 200,000 ਤੋਂ ਘੱਟ ਵਾਹਨ ਵੇਚ ਕੇ ਵੀ ਮਜ਼ਬੂਤ ਮੁਨਾਫ਼ਾ ਕਮਾਉਣਾ ਹੈ।
ਚੀਨ ਵਿੱਚ ਮੰਦੀ ਅਤੇ ਗਲੋਬਲ ਦਬਾਅ
ਪੋਰਸ਼ ਦੀ ਇਸ ਰੁਝਾਨ ਤਬਦੀਲੀ ਪਿੱਛੇ ਚੀਨ ਮਾਰਕੀਟ ਦੀ ਸਥਿਤੀ ਵੀ ਇੱਕ ਵੱਡਾ ਕਾਰਨ ਹੈ। ਕਿਸੇ ਸਮੇਂ ਚੀਨ ਪੋਰਸ਼ ਦੀ ਗਲੋਬਲ ਵਿਕਰੀ ਦਾ ਇੱਕ ਤਿਹਾਈ ਤੋਂ ਵੱਧ ਹਿੱਸਾ ਸੀ, ਪਰ ਹੁਣ ਉੱਥੇ ਮੰਗ ਘਟਣ ਕਾਰਨ 2030 ਤੱਕ ਇਸਦਾ ਹਿੱਸਾ ਘੱਟ ਕੇ 10 ਫੀਸਦੀ ਤੱਕ ਰਹਿਣ ਦਾ ਅਨੁਮਾਨ ਹੈ। ਇਸ ਤੋਂ ਇਲਾਵਾ, ਅਮਰੀਕੀ ਟੈਰਿਫ ਅਤੇ ਮਹਿੰਗੀ ਹੁੰਦੀ ਈਵੀ ਤਕਨਾਲੋਜੀ ਨੇ ਕੰਪਨੀ ਦੀ ਵਿੱਤੀ ਹਾਲਤ ‘ਤੇ ਦਬਾਅ ਵਧਾ ਦਿੱਤਾ ਹੈ। ਇਨ੍ਹਾਂ ਚੁਣੌਤੀਆਂ ਨਾਲ ਨਜਿੱਠਣ ਲਈ ਕੰਪਨੀ ਨੇ ਆਉਣ ਵਾਲੇ ਸਮੇਂ ਵਿੱਚ 10 ਤੋਂ 15 ਫੀਸਦੀ ਓਪਰੇਟਿੰਗ ਮਾਰਜਿਨ ਹਾਸਿਲ ਕਰਨ ਦਾ ਟੀਚਾ ਰੱਖਿਆ ਹੈ।
ਮੈਨੇਜਮੈਂਟ ਅਤੇ ਉਤਪਾਦਨ ‘ਤੇ ਵਿਆਪਕ ਅਸਰ
ਇਹ ਛਾਂਟੀ ਸਿਰਫ਼ ਫੈਕਟਰੀ ਕਰਮਚਾਰੀਆਂ ਤੱਕ ਸੀਮਤ ਨਹੀਂ ਹੋਵੇਗੀ, ਸਗੋਂ ਇਸਦਾ ਅਸਰ ਮੈਨੇਜਮੈਂਟ ਅਤੇ ਵਿਕਾਸ ਟੀਮਾਂ ‘ਤੇ ਵੀ ਪਵੇਗਾ। ਉਤਪਾਦਨ ਕਰਮਚਾਰੀਆਂ ਦੀ ਲਾਗਤ ਵਿੱਚ 30 ਫੀਸਦੀ ਤੱਕ ਅਤੇ ਮੈਨੇਜਮੈਂਟ ਅਹੁਦਿਆਂ ਵਿੱਚ 40 ਫੀਸਦੀ ਤੱਕ ਦੀ ਕਟੌਤੀ ਕੀਤੀ ਜਾਵੇਗੀ। ਇਸ ਤੋਂ ਇਲਾਵਾ ਵਾਹਨ ਵਿਕਾਸ ਦੀ ਲਾਗਤ ਨੂੰ ਵੀ 20 ਫੀਸਦੀ ਤੱਕ ਘਟਾਇਆ ਜਾਵੇਗਾ। ਕੰਪਨੀ ਆਉਣ ਵਾਲੇ ਸਾਲਾਂ ਵਿੱਚ ਨਵੇਂ ਮਾਡਲ ਜਿਵੇਂ ਕਿ ਇਲੈਕਟ੍ਰਿਕ 718 ਬਾਕਸਟਰ ਅਤੇ ਕੈਮਨ ਲਾਂਚ ਕਰਨ ਦੀ ਯੋਜਨਾ ਬਣਾ ਰਹੀ ਹੈ।
