ਕ੍ਰੈਡਿਟ ਰਿਪੋਰਟ ਵਿੱਚ ਬੰਦ ਹੋ ਚੁੱਕੇ ਲੋਨ ਦੇ ਐਕਟਿਵ ਦਿਖਣ ਦਾ ਕਾਰਨ
ਜਦੋਂ ਕੋਈ ਵਿਅਕਤੀ ਆਪਣਾ ਕਰਜ਼ਾ ਪੂਰੀ ਤਰ੍ਹਾਂ ਮੋੜ ਦਿੰਦਾ ਹੈ ਅਤੇ ਬੈਂਕ ਤੋਂ ਨੋ-ਡਿਊਜ਼ ਸਰਟੀਫਿਕੇਟ (NOC) ਪ੍ਰਾਪਤ ਕਰ ਲੈਂਦਾ ਹੈ, ਤਾਂ ਉਸ ਨੂੰ ਲੱਗਦਾ ਹੈ ਕਿ ਉਸ ਦੀ ਸਾਰੀ ਵਿੱਤੀ ਜ਼ਿੰਮੇਵਾਰੀ ਖਤਮ ਹੋ ਗਈ ਹੈ। ਪਰ ਜਦੋਂ ਉਹ ਨਵਾਂ ਲੋਨ ਲੈਣ ਲਈ ਅਪਲਾਈ ਕਰਦਾ ਹੈ, ਤਾਂ ਕ੍ਰੈਡਿਟ ਰਿਪੋਰਟ ਵਿੱਚ ਪੁਰਾਣਾ ਕਰਜ਼ਾ ਅਜੇ ਵੀ ਚਾਲੂ ਜਾਂ ਬਕਾਇਆ ਦਿਖਾਈ ਦਿੰਦਾ ਹੈ। ਕ੍ਰੈਡਿਟ ਬਿਊਰੋ ਜਿਵੇਂ ਕਿ CIBIL ਅਤੇ Experian ਆਪਣੇ ਆਪ ਰਿਕਾਰਡ ਵਿੱਚ ਬਦਲਾਅ ਨਹੀਂ ਕਰਦੇ। ਉਹ ਸਿਰਫ਼ ਉਹ ਜਾਣਕਾਰੀ ਦਿਖਾਉਂਦੇ ਹਨ ਜੋ ਬੈਂਕ ਉਨ੍ਹਾਂ ਨੂੰ ਭੇਜਦੇ ਹਨ। ਜੇਕਰ ਬੈਂਕ ਵੱਲੋਂ ਸਮੇਂ ਸਿਰ ਸਥਿਤੀ ਅੱਪਡੇਟ ਨਹੀਂ ਕੀਤੀ ਜਾਂਦੀ, ਤਾਂ ਤੁਹਾਡੇ ਕ੍ਰੈਡਿਟ ਸਕੋਰ ‘ਤੇ ਮਾੜਾ ਅਸਰ ਪੈਂਦਾ ਹੈ।
ਜ਼ਰੂਰੀ ਦਸਤਾਵੇਜ਼ ਅਤੇ ‘ਕਲੋਜ਼ਡ’ ਤੇ ‘ਸੈਟਲਡ’ ਵਿੱਚ ਅੰਤਰ
ਕਿਸੇ ਵੀ ਬੈਂਕ ਜਾਂ ਫਾਈਨਾਂਸ ਕੰਪਨੀ ਕੋਲ ਜਾਣ ਤੋਂ ਪਹਿਲਾਂ ਕੁਝ ਜ਼ਰੂਰੀ ਦਸਤਾਵੇਜ਼ ਆਪਣੇ ਕੋਲ ਸੁਰੱਖਿਅਤ ਰੱਖਣੇ ਚਾਹੀਦੇ ਹਨ। ਇਨ੍ਹਾਂ ਵਿੱਚ ਨੋ-ਡਿਊਜ਼ ਸਰਟੀਫਿਕੇਟ (NOC), ਲੋਨ ਬੰਦ ਹੋਣ ਦਾ ਪੱਤਰ, ਆਖਰੀ ਕਿਸ਼ਤ ਦੀ ਰਸੀਦ ਅਤੇ ਬੈਂਕ ਪਾਸਬੁੱਕ ਦੀ ਐਂਟਰੀ ਸ਼ਾਮਲ ਹੈ। ਇਸ ਤੋਂ ਇਲਾਵਾ, ਵਾਹਨ ਲੋਨ ਦੇ ਮਾਮਲੇ ਵਿੱਚ ਆਰ.ਸੀ. (RC) ਵਿੱਚੋਂ ਬੈਂਕ ਦਾ ਨਾਮ ਹਟਾਉਣਾ ਵੀ ਜ਼ਰੂਰੀ ਹੈ। ਰਿਪੋਰਟ ਵਿੱਚ ਇਹ ਵੀ ਦੇਖਣਾ ਚਾਹੀਦਾ ਹੈ ਕਿ ਲੋਨ ਅੱਗੇ ‘Closed’ ਲਿਖਿਆ ਹੈ ਜਾਂ ‘Settled’। ਪੂਰਾ ਕਰਜ਼ਾ ਚੁਕਾਉਣ ਵਾਲੇ ਲੋਨ ਨੂੰ ‘Closed’ ਕਿਹਾ ਜਾਂਦਾ ਹੈ, ਜਦੋਂ ਕਿ ਘੱਟ ਰਕਮ ਦੇ ਸਮਝੌਤੇ ਵਾਲੇ ਲੋਨ ਨੂੰ ‘Settled’ ਕਿਹਾ ਜਾਂਦਾ ਹੈ, ਜਿਸ ਦਾ CIBIL ਸਕੋਰ ‘ਤੇ ਅਸਰ ਪੈਂਦਾ ਹੈ।
ਬੈਂਕ ਅਤੇ CIBIL ਰਾਹੀਂ ਗਲਤੀ ਸੁਧਾਰਨ ਦੀ ਪ੍ਰਕਿਰਿਆ
ਜੇਕਰ ਕ੍ਰੈਡਿਟ ਰਿਪੋਰਟ ਵਿੱਚ ਕੋਈ ਗਲਤੀ ਨਜ਼ਰ ਆਉਂਦੀ ਹੈ, ਤਾਂ ਸਭ ਤੋਂ ਪਹਿਲਾਂ ਆਪਣੀ ਬੈਂਕ ਸ਼ਾਖਾ ਨਾਲ ਸੰਪਰਕ ਕਰੋ ਅਤੇ ਲੋਨ ਖਾਤਾ ਨੰਬਰ, ਬੰਦ ਹੋਣ ਦੀ ਮਿਤੀ ਅਤੇ NOC ਦੀ ਕਾਪੀ ਨਾਲ ਲੈ ਕੇ ਜਾਓ। ਬੈਂਕ ਤੋਂ ਲਿਖਤੀ ਤੌਰ ‘ਤੇ ਪੁਸ਼ਟੀ ਲਵੋ ਕਿ ਜਾਣਕਾਰੀ CIBIL ਨੂੰ ਭੇਜ ਦਿੱਤੀ ਗਈ ਹੈ। ਜੇਕਰ ਬੈਂਕ ਵੱਲੋਂ ਹੱਲ ਨਹੀਂ ਕੀਤਾ ਜਾਂਦਾ, ਤਾਂ ਤੁਸੀਂ CIBIL ਦੀ ਅਧਿਕਾਰਤ ਵੈੱਬਸਾਈਟ ‘ਤੇ ਜਾ ਕੇ ਆਨਲਾਈਨ ਵਿਵਾਦ (Dispute) ਦਰਜ ਕਰ ਸਕਦੇ ਹੋ ਅਤੇ ਆਪਣੇ ਦਸਤਾਵੇਜ਼ ਅਪਲੋਡ ਕਰ ਸਕਦੇ ਹੋ। CIBIL ਆਮ ਤੌਰ ‘ਤੇ 30 ਦਿਨਾਂ ਦੇ ਅੰਦਰ ਬੈਂਕ ਨਾਲ ਪੁਸ਼ਟੀ ਕਰਕੇ ਰਿਕਾਰਡ ਨੂੰ ਠੀਕ ਕਰ ਦਿੰਦਾ ਹੈ। ਜੇਕਰ ਫਿਰ ਵੀ ਸਮੱਸਿਆ ਹੱਲ ਨਾ ਹੋਵੇ, ਤਾਂ ਤੁਸੀਂ ਭਾਰਤੀ ਰਿਜ਼ਰਵ ਬੈਂਕ (RBI) ਦੇ ਔਨਲਾਈਨ ਪੋਰਟਲ ਰਾਹੀਂ ਬੈਂਕਿੰਗ ਓਂਬਡਸਮੈਨ ਕੋਲ ਸ਼ਿਕਾਇਤ ਦਰਜ ਕਰਵਾ ਸਕਦੇ ਹੋ।
