ਐਮਜ਼ੌਨ ਵੱਲੋਂ ਵੱਡੀ ਪੱਧਰ ‘ਤੇ ਸੀਜ਼ਨਲ ਭਰਤੀ ਦੀ ਸ਼ੁਰੂਆਤ
ਵਿਸ਼ਵ ਦੀ ਪ੍ਰਮੁੱਖ ਈ-ਕਾਮਰਸ ਕੰਪਨੀ ਐਮਜ਼ੌਨ ਨੇ ਆਉਣ ਵਾਲੇ ਛੁੱਟੀਆਂ ਅਤੇ ਤਿਉਹਾਰਾਂ ਦੇ ਸੀਜ਼ਨ ਲਈ ਅਮਰੀਕਾ ਭਰ ਵਿੱਚ 3 ਲੱਖ ਤੋਂ ਵੱਧ ਕਰਮਚਾਰੀਆਂ ਨੂੰ ਨੌਕਰੀਆਂ ਦੇਣ ਦਾ ਐਲਾਨ ਕੀਤਾ ਹੈ। ਪਿਛਲੇ ਸਾਲ ਦੇ ਮੁਕਾਬਲੇ ਇਸ ਵਾਰ ਭਰਤੀ ਵਿੱਚ 20 ਫੀਸਦੀ ਦਾਾ ਵਾਧਾ ਕੀਤਾ ਗਿਆ ਹੈ, ਕਿਉਂਕਿ ਪਿਛਲੇ ਸਾਲ 2.5 ਲੱਖ ਅਸਾਮੀਆਂ ਭਰੀਆਂ ਗਈਆਂ ਸਨ। ਕੰਪਨੀ ਦਾ ਇਹ ਕਦਮ ਗਾਹਕਾਂ ਦੀ ਵੱਧ ਰਹੀ ਮੰਗ ਨੂੰ ਪੂਰਾ ਕਰਨ ਅਤੇ ਆਪਣੇ ਲੌਜਿਸਟਿਕਸ ਅਤੇ ਵੇਅਰਹਾਊਸ ਨੈੱਟਵਰਕ ਨੂੰ ਮਜ਼ਬੂਤ ਕਰਨ ਲਈ ਚੁੱਕਿਆ ਗਿਆ ਹੈ, ਤਾਂ ਜੋ ਸਮੇਂ ਸਿਰ ਆਰਡਰਾਂ ਦੀ ਡਿਲਿਵਰੀ ਯਕੀਨੀ ਬਣਾਈ ਜਾ ਸਕੇ।
ਆਕਰਸ਼ਕ ਤਨਖਾਹ ਅਤੇ ਵਿੱਤੀ ਲਾਭ
ਨੌਕਰੀ ਦੇ ਚਾਹਵਾਨਾਂ ਨੂੰ ਆਕਰਸ਼ਿਤ ਕਰਨ ਲਈ ਐਮਜ਼ੌਨ ਵੱਲੋਂ ਪ੍ਰਤੀ ਘੰਟਾ ਉੱਤਮ ਤਨਖਾਹ ਪੈਕੇਜ ਪੇਸ਼ ਕੀਤੇ ਜਾ ਰਹੇ ਹਨ। ਸੀਜ਼ਨਲ ਕਰਮਚਾਰੀਆਂ ਨੂੰ ਔਸਤਨ 20 ਡਾਲਰ ਪ੍ਰਤੀ ਘੰਟਾ ਮਿਲੇਗਾ, ਜੋ ਕਿ ਫੁੱਲ-ਟਾਈਮ ਕਰਮਚਾਰੀਆਂ ਦੀ ਸ਼ੁਰੂਆਤੀ ਤਨਖਾਹ ਦੇ ਬਰਾਬਰ ਹੈ। ਪੂਰੇ ਸਮੇਂ ਦੇ ਮੁਲਾਜ਼ਮਾਂ ਦੀ ਔਸਤ ਤਨਖਾਹ ਲਗਭਗ 24 ਡਾਲਰ ਪ੍ਰਤੀ ਘੰਟਾ ਤੱਕ ਬਣਦੀ ਹੈ। ਬੈਨੀਫਿਟਸ ਨੂੰ ਜੋੜਨ ਤੋਂ ਬਾਅਦ ਪੂਰੇ ਸਮੇਂ ਦੇ ਕਰਮਚਾਰੀਆਂ ਦਾ ਕੁੱਲ ਮੁਆਵਜ਼ਾ 32 ਡਾਲਰ ਪ੍ਰਤੀ ਘੰਟਾ ਤੋਂ ਵੀ ਵੱਧ ਹੋ ਜਾਂਦਾ ਹੈ, ਜੋ ਕਿ ਕਰਮਚਾਰੀਆਂ ਲਈ ਆਰਥਿਕ ਤੌਰ ‘ਤੇ ਬਹੁਤ ਲਾਹੇਵੰਦ ਸਾਬਤ ਹੋਵੇਗਾ।
ਸੀਜ਼ਨਲ ਕਰਮਚਾਰੀਆਂ ਲਈ ਵਿਸ਼ੇਸ਼ ਸਿਹਤ ਸੇਵਾਵਾਂ
ਕਰਮਚਾਰੀਆਂ ਦੀ ਭਲਾਈ ਨੂੰ ਮੁੱਖ ਰੱਖਦਿਆਂ ਐਮਜ਼ੌਨ ਨੇ ਇਸ ਵਾਰ ਵੱਡਾ ਫੈਸਲਾ ਲੈਂਦਿਆਂ ਸੀਜ਼ਨਲ ਸਟਾਫ਼ ਲਈ ਹੈਲਥਕੇਅਰ ਕਵਰੇਜ ਦੀ ਸ਼ੁਰੂਆਤ ਕੀਤੀ ਹੈ। 1 ਜਨਵਰੀ 2027 ਤੋਂ, ਉਹ ਸਾਰੇ ਸੀਜ਼ਨਲ ਕਰਮਚਾਰੀ ਜਿਹੜੇ ਹਫ਼ਤੇ ਵਿੱਚ ਘੱਟੋ-ਘੱਟ 30 ਘੰਟੇ ਕੰਮ ਕਰਦੇ ਹਨ, ਸਿਹਤ ਬੀਮੇ ਦਾ ਲਾਭ ਲੈ ਸਕਣਗੇ। ਇਹ ਯੋਜਨਾਵਾਂ ਬਹੁਤ ਹੀ ਕਿਫ਼ਾਇਤੀ ਦਰਾਂ ‘ਤੇ ਉਪਲਬਧ ਹੋਣਗੀਆਂ। ਰਿਟੇਲ ਅਤੇ ਲੌਜਿਸਟਿਕਸ ਸੈਕਟਰ ਵਿੱਚ ਇਹ ਪਹਿਲੀ ਵਾਰ ਹੈ ਜਦੋਂ ਅਸਥਾਈ ਕਰਮਚਾਰੀਆਂ ਨੂੰ ਅਜਿਹੀ ਮੈਡੀਕਲ ਸੁਰੱਖਿਆ ਪ੍ਰਦਾਨ ਕੀਤੀ ਜਾ ਰਹੀ ਹੈ।
ਅਪਲਾਈ ਕਰਨ ਦਾ ਤਰੀਕਾ ਅਤੇ ਭਰਤੀ ਪ੍ਰਕਿਰਿਆ
ਇਹ ਭਰਤੀ ਮੁਹਿੰਮ ਅਕਤੂਬਰ ਤੋਂ ਦਸੰਬਰ ਤੱਕ ਜਾਰੀ ਰਹੇਗੀ, ਜਿਸ ਦੌਰਾਨ ਕੰਪਨੀ ਹਰ ਹਫ਼ਤੇ ਨਵੀਆਂ ਅਸਾਮੀਆਂ ਆਨਲਾਈਨ ਪੋਰਟਲ ‘ਤੇ ਅੱਪਡੇਟ ਕਰੇਗੀ। ਉਮੀਦਵਾਰ ਦੇਸ਼ ਭਰ ਵਿੱਚ ਆਪਣੇ ਨੇੜਲੇ ਫੁਲਫਿਲਮੈਂਟ ਸੈਂਟਰਾਂ ਅਤੇ ਡਿਲਿਵਰੀ ਸਟੇਸ਼ਨਾਂ ਲਈ ਪਾਰਟ-ਟਾਈਮ, ਫੁੱਲ-ਟਾਈਮ ਜਾਂ ਸੀਜ਼ਨਲ ਭੂਮਿਕਾਵਾਂ ਲਈ ਅਪਲਾਈ ਕਰ ਸਕਦੇ ਹਨ। ਇੱਛੁਕ ਉਮੀਦਵਾਰ ਐਮਜ਼ੌਨ ਦੀ ਅਧਿਕਾਰਤ ਜੌਬ ਵੈੱਬਸਾਈਟ ‘ਤੇ ਜਾ ਕੇ ਵੇਰਵੇ ਦੇਖ ਸਕਦੇ ਹਨ ਅਤੇ ਨਵੀਨਤਮ ਅੱਪਡੇਟ ਲਈ ਅਲਰਟ ਸਬਸਕ੍ਰਾਈਬ ਕਰ ਸਕਦੇ ਹਨ।
