ਸ਼੍ਰੀ ਕ੍ਰਿਸ਼ਨ ਜਨਮਾਸ਼ਟਮੀ ਦਾ ਤਿਉਹਾਰ ਭਾਰਤ ਵਿੱਚ ਬਹੁਤ ਧੂਮਧਾਮ ਅਤੇ ਸਰਧਾ ਨਾਲ ਮਨਾਇਆ ਜਾਂਦਾ ਹੈ। ਰਾਜਧਾਨੀ ਦਿੱਲੀ ਅਤੇ ਆਸ-ਪਾਸ ਦੇ ਖੇਤਰਾਂ (ਐਨ.ਸੀ.ਆਰ.) ਵਿੱਚ ਇਸ ਸੁਭ ਅਵਸਰ ‘ਤੇ ਅਲੌਕਿਕ ਰੌਣਕ ਦੇਖਣ ਨੂੰ ਮਿਲਦੀ ਹੈ। ਮੰਦਰਾਂ ਨੂੰ ਰੰਗ-ਬਿਰੰਗੀਆਂ ਲਾਈਟਾਂ, ਸੁਗੰਧਿਤ ਛਤਰੀਆਂ ਅਤੇ ਫੁੱਲਾਂ ਨਾਲ ਸਜਾਇਆ ਜਾਂਦਾ ਹੈ। “ਹਰੇ ਕ੍ਰਿਸ਼ਨਾ” ਦੇ ਜੈਕਾਰਿਆਂ ਨਾਲ ਪੂਰਾ ਵਾਤਾਵਰਣ ਭਗਤੀਮਈ ਹੋ ਜਾਂਦਾ ਹੈ। ਜੇਕਰ ਤੁਸੀਂ ਇਸ ਵਾਰ ਆਪਣੇ ਪਰਿਵਾਰ ਨਾਲ ਸ਼੍ਰੀ ਕ੍ਰਿਸ਼ਨ ਦੇ ਦਰਸ਼ਨ ਕਰਨ ਅਤੇ ਰੋਚਕ ਝਾਂਕੀਆਂ ਦੇਖਣ ਦੀ ਯੋਜਨਾ ਬਣਾ ਰਹੇ ਹੋ, ਤਾਂ ਦਿੱਲੀ-ਐਨ.ਸੀ.ਆਰ. ਦੇ ਇਹ 7 ਪ੍ਰਮੁੱਖ ਮੰਦਰ ਤੁਹਾਡੇ ਲਈ ਸਭ ਤੋਂ ਵਧੀਆ ਵਿਕਲਪ ਹਨ।
ਇਸਕੋਨ ਮੰਦਰ, ਇਸਟ ਆਫ ਕੈਲਾਸ਼ (ਦਿੱਲੀ)
ਦਿੱਲੀ ਦੇ ਇਸਟ ਆਫ ਕੈਲਾਸ਼ ਸਥਿਤ ਇਸਕੋਨ ਮੰਦਰ (ISKCON) ਜਨਮਾਸ਼ਟਮੀ ਦੇ ਜਸ਼ਨਾਂ ਦਾ ਮੁੱਖ ਕੇਂਦਰ ਹੁੰਦਾ ਹੈ। ਇੱਥੇ ਰਾਧਾ ਪਾਰਥਸਾਰਥੀ ਦੇ ਦਰਸ਼ਨਾਂ ਲਈ ਦੇਸ਼-ਵਿਦੇਸ਼ ਤੋਂ ਹਜ਼ਾਰਾਂ ਸ਼ਰਧਾਲੂ ਪਹੁੰਚਦੇ ਹਨ। ਮੰਦਰ ਨੂੰ ਦੇਸ਼-ਵਿਦੇਸ਼ ਤੋਂ ਮੰਗਵਾਏ ਗਏ ਵਿਸ਼ੇਸ਼ ਫੁੱਲਾਂ ਨਾਲ ਸਜਾਇਆ ਜਾਂਦਾ ਹੈ। ਅੱਧੀ ਰਾਤ ਨੂੰ ਭਗਵਾਨ ਕ੍ਰਿਸ਼ਨ ਦੇ ਬਾਲ ਰੂਪ ਦਾ ਦੁੱਧ, ਸ਼ਹਿਦ ਅਤੇ ਫਲਾਂ ਦੇ ਰਸ ਨਾਲ ਮਹਾ-ਅਭਿਸ਼ੇਕ ਕੀਤਾ ਜਾਂਦਾ ਹੈ, ਜੋ ਦੇਖਣਯੋਗ ਹੁੰਦਾ ਹੈ।
ਛੱਤਰਪੁਰ ਮੰਦਰ (ਸ਼੍ਰੀ ਆਦਿਆ ਕਾਤਿਆਯਨੀ ਸ਼ਕਤੀਪੀਠ)
ਛੱਤਰਪੁਰ ਮੰਦਰ ਪਰਿਸਰ ਲਗਭਗ 70 ਏਕੜ ਵਿੱਚ ਫੈਲਿਆ ਹੋਇਆ ਹੈ। ਹਾਲਾਂਕਿ ਇਹ ਮੰਦਰ ਦੇਵੀ ਕਾਤਿਆਯਨੀ ਲਈ ਪ੍ਰਸਿੱਧ ਹੈ, ਪਰ ਜਨਮਾਸ਼ਟਮੀ ‘ਤੇ ਇੱਥੇ ਭਗਵਾਨ ਕ੍ਰਿਸ਼ਨ ਦੇ ਜੀਵਨ ਨਾਲ ਜੁੜੀਆਂ ਬਹੁਤ ਹੀ ਸੁੰਦਰ ਅਤੇ ਵਿਸ਼ਾਲ ਝਾਂਕੀਆਂ ਤਿਆਰ ਕੀਤੀਆਂ ਜਾਂਦੀਆਂ ਹਨ। ਵੱਡਾ ਖੇਤਰ ਹੋਣ ਕਰਕੇ ਪਰਿਵਾਰ ਨਾਲ ਆਰਾਮ ਨਾਲ ਘੁੰਮਣ ਅਤੇ ਝਾਂਕੀਆਂ ਦੇਖਣ ਲਈ ਇਹ ਬਹੁਤ ਵਧੀਆ ਜਗ੍ਹਾ ਹੈ।
ਬਿਰਲਾ ਮੰਦਰ (ਲਕਸ਼ਮੀਨਾਰਾਇਣ ਮੰਦਰ)
ਕਨਾਟ ਪਲੇਸ ਦੇ ਨੇੜੇ ਸਥਿਤ ਇਤਿਹਾਸਕ ਬਿਰਲਾ ਮੰਦਰ ਦਾ ਉਦਘਾਟਨ 1939 ਵਿੱਚ ਮਹਾਤਮਾ ਗਾਂਧੀ ਦੁਆਰਾ ਕੀਤਾ ਗਿਆ ਸੀ। ਜਨਮਾਸ਼ਟਮੀ ਵਾਲੇ ਦਿਨ ਇੱਥੇ ਰਵਾਇਤੀ ਸੰਸਕ੍ਰਿਤਿਕ ਪ੍ਰੋਗਰਾਮ, ਭਜਨ-ਕੀਰਤਨ ਅਤੇ ਰੰਗਾਰੰਗ ਲਾਈਟ ਸ਼ੋਅ ਆਯੋਜਿਤ ਕੀਤੇ ਜਾਂਦੇ ਹਨ। ਰਾਤ ਨੂੰ ਭਗਵਾਨ ਦੇ ਜਨਮ ਸਮੇਂ ਵਿਸ਼ੇਸ਼ ਆਰਤੀ ਹੁੰਦੀ ਹੈ ਅਤੇ ਪ੍ਰਸਾਦ ਵੰਡਿਆ ਜਾਂਦਾ ਹੈ।
ਅਕਸ਼ਰਧਾਮ ਮੰਦਰ
ਸਵਾਮੀਨਾਰਾਇਣ ਅਕਸ਼ਰਧਾਮ ਮੰਦਰ ਆਪਣੀ ਵਿਸ਼ਾਲਤਾ, ਭਵਨ ਨਿਰਮਾਣ ਕਲਾ ਅਤੇ ਅਧਿਆਤਮਿਕ ਸ਼ਾਂਤੀ ਲਈ ਜਾਣਿਆ ਜਾਂਦਾ ਹੈ। ਜਨਮਾਸ਼ਟਮੀ ਦੇ ਪਵਿੱਤਰ ਦਿਹਾੜੇ ‘ਤੇ ਮੰਦਰ ਨੂੰ ਵਿਸ਼ੇਸ਼ ਤੌਰ ‘ਤੇ ਸਜਾਇਆ ਜਾਂਦਾ ਹੈ। ਇੱਥੇ ਪਰਿਵਾਰ ਨਾਲ ਆ ਕੇ ਭਗਵਾਨ ਦੇ ਦਰਸ਼ਨ ਕਰਨ ਦੇ ਨਾਲ-ਨਾਲ ਭਾਰਤੀ ਸੰਸਕ੍ਰਿਤੀ ਅਤੇ ਅਧਿਆਤਮਿਕਤਾ ਦਾ ਅਨੋਖਾ ਅਨੁਭਵ ਮਿਲਦਾ ਹੈ।
ਇਸਕੋਨ ਮੰਦਰ, ਨੋਇਡਾ (ਸੈਕਟਰ 33)
ਨੋਇਡਾ ਦੇ ਸੈਕਟਰ 33 ਵਿੱਚ ਸਥਿਤ ਇਸਕੋਨ ਮੰਦਰ ਵਿੱਚ ਵੀ ਜਨਮਾਸ਼ਟਮੀ ਬਹੁਤ ਉਤਸ਼ਾਹ ਨਾਲ ਮਨਾਈ ਜਾਂਦੀ ਹੈ। ਇੱਥੇ ਬੱਚਿਆਂ ਦੁਆਰਾ ਕ੍ਰਿਸ਼ਨ ਲੀਲਾ ਦਾ ਨਾਟਕੀ ਰੂਪਾਂਤਰਨ ਕੀਤਾ ਜਾਂਦਾ ਹੈ ਅਤੇ ਨਿਰੰਤਰ ਹਰਿਨਾਮ ਸੰਕੀਰਤਨ ਚੱਲਦਾ ਹੈ। ਅੱਧੀ ਰਾਤ ਦੀ ਮਹਾ-ਆਰਤੀ ਵਿੱਚ ਸ਼ਾਮਲ ਹੋਣ ਲਈ ਵੱਡੀ ਗਿਣਤੀ ਵਿੱਚ ਸੰਗਤ ਪਹੁੰਚਦੀ ਹੈ।
ਗੀਤਾ ਗਾਇਤਰੀ ਧਾਮ, ਗੁਰੂਗ੍ਰਾਮ
ਗੁਰੂਗ੍ਰਾਮ ਦੇ ਸੈਕਟਰ 41 ਵਿੱਚ ਸਥਿਤ ਗੀਤਾ ਗਾਇਤਰੀ ਧਾਮ ਇੱਕ ਸ਼ਾਂਤ ਅਤੇ ਪਵਿੱਤਰ ਸਥਾਨ ਹੈ। ਜਨਮਾਸ਼ਟਮੀ ਦੇ ਮੌਕੇ ‘ਤੇ ਇੱਥੇ ਗੋਕੁਲ ਅਤੇ ਮਥੁਰਾ ਦੇ ਦ੍ਰਿਸ਼ਾਂ ਨੂੰ ਦਰਸਾਉਂਦੀਆਂ ਮਿਨੀਏਚਰ ਝਾਂਕੀਆਂ ਬਣਾਈਆਂ ਜਾਂਦੀਆਂ ਹਨ। ਗੁਰੂਗ੍ਰਾਮ ਵਿੱਚ ਰਹਿਣ ਵਾਲੇ ਪਰਿਵਾਰਾਂ ਲਈ ਇਹ ਮੰਦਰ ਦਰਸ਼ਨਾਂ ਲਈ ਇੱਕ ਉੱਤਮ ਸਥਾਨ ਹੈ।
ਇਸਕੋਨ ਮੰਦਰ, ਦਵਾਰਕਾ (ਸੈਕਟਰ 13)
ਪੱਛਮੀ ਦਿੱਲੀ ਦੇ ਦਵਾਰਕਾ ਸੈਕਟਰ 13 ਸਥਿਤ ਇਸਕੋਨ ਮੰਦਰ ਵਿੱਚ ਪਰਿਵਾਰਾਂ ਅਤੇ ਬੱਚਿਆਂ ਲਈ ਵਿਸ਼ੇਸ਼ ਅਧਿਆਤਮਿਕ ਪ੍ਰੋਗਰਾਮ ਉਲੀਕੇ ਜਾਂਦੇ ਹਨ। ਇੱਥੇ ਜੈਵਿਕ ਪ੍ਰਸਾਦ, ਧਾਰਮਿਕ ਪੁਸਤਕਾਂ ਦੇ ਸਟਾਲ ਅਤੇ ਮਧੁਰ ਕੀਰਤਨ ਦਾ ਆਨੰਦ ਲਿਆ ਜਾ ਸਕਦਾ ਹੈ। ਰਾਤ ਦੇ ਸਮੇਂ ਫੁੱਲਾਂ ਦੀ ਵਰਖਾ ਅਤੇ ਸ਼ੰਖ ਧੁਨੀ ਨਾਲ ਭਗਵਾਨ ਦਾ ਸਵਾਗਤ ਕੀਤਾ ਜਾਂਦਾ ਹੈ।
