ਪ੍ਰਿਯੰਕਾ ਚੋਪੜਾ ਨੇ ਆਪਣੇ ਨਵੇਂ ਹੋਲੀਵੁੱਡ ਪ੍ਰੋਜੈਕਟ ਬਾਰੇ ਕੀਤਾ ਖੁਲਾਸਾ
ਗਲੋਬਲ ਸਟਾਰ ਪ੍ਰਿਯੰਕਾ ਚੋਪੜਾ ਨੇ ਆਪਣੇ ਪ੍ਰਸ਼ੰਸਕਾਂ ਨੂੰ ਇੱਕ ਵਾਰ ਫਿਰ ਵੱਡੀ ਖੁਸ਼ਖਬਰੀ ਦਿੱਤੀ ਹੈ। ਅਦਾਕਾਰਾ ਨੇ ਆਪਣੇ ਅਗਲੇ ਵੱਡੇ ਹੋਲੀਵੁੱਡ ਪ੍ਰੋਜੈਕਟ ਦਾ ਐਲਾਨ ਕੀਤਾ ਹੈ, ਜਿਸ ਵਿੱਚ ਉਹ ਓਸਕਾਰ ਜੇਤੂ ਅਦਾਕਾਰ ਰਸਲ ਕ੍ਰੋਅ ਨਾਲ ਨਜ਼ਰ ਆਵੇਗੀ। ਇਸ ਸਾਇੰਸ-ਫਿਕਸ਼ਨ ਐਕਸ਼ਨ ਥ੍ਰਿਲਰ ਫਿਲਮ ਦਾ ਨਾਮ ‘Bluefly’ ਹੈ। ਪ੍ਰਿਯੰਕਾ ਨੇ ਆਪਣੇ ਸੋਸ਼ਲ ਮੀਡੀਆ ਅਕਾਊਂਟ ‘ਤੇ ਫਿਲਮ ਦੀ ਘੋਸ਼ਣਾ ਦੀ ਖਬਰ ਸਾਂਝੀ ਕਰਦਿਆਂ ਲਿਖਿਆ, “ਅਗਲੇ ਸਫ਼ਰ ਵੱਲ।” ਇਸ ਖ਼ਬਰ ਦੇ ਸਾਹਮਣੇ ਆਉਂਦੇ ਹੀ ਪ੍ਰਸ਼ੰਸਕਾਂ ਅਤੇ ਮਨੋਰੰਜਨ ਜਗਤ ਵਿੱਚ ਉਤਸ਼ਾਹ ਦੀ ਲਹਿਰ ਦੌੜ ਗਈ।
ਕੀ ਹੈ ਫਿਲਮ ‘Bluefly’ ਦੀ ਕਹਾਣੀ?
ਫਿਲਮ ‘Bluefly’ ਦੀ ਕਹਾਣੀ ਇੱਕ ਰੋਮਾਂਚਕ ਅਤੇ ਸਸਪੈਂਸ ਨਾਲ ਭਰਪੂਰ ਮਿਸ਼ਨ ‘ਤੇ ਆਧਾਰਿਤ ਹੈ। ਕਾਂਗੋ ਦੇ ਜੰਗਲਾਂ ਵਿੱਚ ਸੈੱਟ ਕੀਤੀ ਗਈ ਇਹ ਕਹਾਣੀ ਇੱਕ ਸੰਯੁਕਤ ਰਾਸ਼ਟਰ (UN) ਦੇ ਅਨੁਵਾਦਕ ਦੁਆਲੇ ਘੁੰਮਦੀ ਹੈ, ਜੋ ਆਪਣੇ ਨਿੱਜੀ ਦੁੱਖ ਨਾਲ ਜੂਝ ਰਿਹਾ ਹੈ। ਉਸਨੂੰ ਇੱਕ ਗੁਪਤ ਬਲੈਕ-ਓਪਸ ਮਿਸ਼ਨ ਵਿੱਚ ਸ਼ਾਮਲ ਕੀਤਾ ਜਾਂਦਾ ਹੈ, ਜਿਸਦਾ ਮਕਸਦ ਇੱਕ ਹਾਦਸਾਗ੍ਰਸਤ ਹੋਏ ਰਹੱਸਮਈ ਜਹਾਜ਼ ਨੂੰ ਲੱਭਣਾ ਹੈ, ਜੋ ਸਰਕਾਰੀ ਰਿਕਾਰਡ ਵਿੱਚ ਮੌਜੂਦ ਹੀ ਨਹੀਂ ਹੈ। ਜਦੋਂ ਸਪੈਸ਼ਲ ਆਪ੍ਰੇਸ਼ਨ ਟੀਮ ਖਤਰਨਾਕ ਇਲਾਕਿਆਂ ਵਿੱਚੋਂ ਲੰਘਦੀ ਹੈ, ਤਾਂ ਮਿਸ਼ਨ ਇੱਕ ਖਤਰਨਾਕ ਮੋੜ ਲੈ ਲੈਂਦਾ ਹੈ ਅਤੇ ਟੀਮ ਨੂੰ ਇਹ ਅਹਿਸਾਸ ਹੁੰਦਾ ਹੈ ਕਿ ਉਸ ਜਹਾਜ਼ ਨੂੰ ਕਦੇ ਵਾਪਸ ਲਿਆਉਣ ਲਈ ਬਣਾਇਆ ਹੀ ਨਹੀਂ ਗਿਆ ਸੀ।
ਦਮਦਾਰ ਸਟਾਰਕਾਸਟ ਅਤੇ ਤਕਨੀਕੀ ਟੀਮ
ਇਸ ਫਿਲਮ ਦਾ ਨਿਰਦੇਸ਼ਨ ਨਿਮਰੋਦ ਅੰਤਾਲ ਵਲੋਂ ਕੀਤਾ ਜਾ ਰਿਹਾ ਹੈ, ਜਦਕਿ ਇਸਦੀ ਕਹਾਣੀ ਡੇਵਿਡ ਫ੍ਰਿਗੇਰੀਓ, ਵਿਲੀਅਮ ਯੂਬੈਂਕ ਅਤੇ ਕਾਰਲਾਈਲ ਯੂਬੈਂਕ ਨੇ ਲਿਖੀ ਹੈ। ਫਿਲਮ ਵਿੱਚ ਪ੍ਰਿਯੰਕਾ ਚੋਪੜਾ ਦੇ ਨਾਲ ਨਜ਼ਰ ਆਉਣ ਵਾਲੇ ਰਸਲ ਕ੍ਰੋਅ ਹੋਲੀਵੁੱਡ ਦੇ ਮੰਨੇ-ਪ੍ਰਮੰਨੇ ਅਦਾਕਾਰ ਹਨ, ਜਿਨ੍ਹਾਂ ਨੂੰ ਫਿਲਮ ‘ਗਲੇਡੀਏਟਰ’ ਵਿੱਚ ਉਨ੍ਹਾਂ ਦੀ ਸ਼ਾਨਦਾਰ ਅਦਾਕਾਰੀ ਲਈ ਓਸਕਾਰ ਐਵਾਰਡ ਮਿਲ ਚੁੱਕਾ ਹੈ। ਫਿਲਮ ਦੀ ਸ਼ੂਟਿੰਗ ਆਸਟ੍ਰੇਲੀਆ ਦੇ ਗੋਲਡ ਕੋਸਟ ‘ਤੇ ਜਲਦ ਹੀ ਸ਼ੁਰੂ ਹੋਣ ਜਾ ਰਹੀ ਹੈ।
ਨਿਕ ਜੋਨਸ ਅਤੇ ਪ੍ਰਸ਼ੰਸਕਾਂ ਨੇ ਦਿੱਤੀਆਂ ਵਧਾਈਆਂ
ਪ੍ਰਿਯੰਕਾ ਦੀ ਇਸ ਪ੍ਰਾਪਤੀ ‘ਤੇ ਉਨ੍ਹਾਂ ਦੇ ਪਤੀ ਅਤੇ ਮਸ਼ਹੂਰ ਗਾਇਕ ਨਿਕ ਜੋਨਸ ਨੇ ਤੁਰੰਤ ਪ੍ਰਤੀਕਿਰਿਆ ਦਿੱਤੀ। ਨਿਕ ਨੇ ਕਮੈਂਟ ਸੈਕਸ਼ਨ ਵਿੱਚ ਫਾਇਰ ਈਮੋਜੀ ਪੋਸਟ ਕਰਕੇ ਆਪਣੀ ਪਤਨੀ ਦਾ ਹੌਸਲਾ ਵਧਾਇਆ। ਇਸ ਤੋਂ ਇਲਾਵਾ ਬੋਲੀਵੁੱਡ ਅਦਾਕਾਰਾ ਹੁਮਾ ਕੁਰੈਸ਼ੀ ਅਤੇ ਲੱਖਾਂ ਪ੍ਰਸ਼ੰਸਕਾਂ ਨੇ ਵੀ ਪ੍ਰਿਯੰਕਾ ਨੂੰ ਇਸ ਨਵੇਂ ਪ੍ਰੋਜੈਕਟ ਲਈ ਸ਼ੁਭਕਾਮਨਾਵਾਂ ਦਿੱਤੀਆਂ ਅਤੇ ਉਨ੍ਹਾਂ ਦੀ ਅੰਤਰਰਾਸ਼ਟਰੀ ਸਫਲਤਾ ਦੀ ਸ਼ਲਾਘਾ ਕੀਤੀ।
ਭਾਰਤੀ ਅਤੇ ਅੰਤਰਰਾਸ਼ਟਰੀ ਸਿਨੇਮਾ ਵਿੱਚ ਸਰਗਰਮ
ਪ੍ਰਿਯੰਕਾ ਚੋਪੜਾ ਦਾ ਸ਼ਡਿਊਲ ਇਸ ਸਮੇਂ ਕਾਫੀ ਰੁੱਝਿਆ ਹੋਇਆ ਹੈ। ਹੋਲੀਵੁੱਡ ਪ੍ਰੋਜੈਕਟ ‘Bluefly’ ਤੋਂ ਇਲਾਵਾ, ਉਹ ਭਾਰਤੀ ਸਿਨੇਮਾ ਵਿੱਚ ਵੀ ਨਿਰਦੇਸ਼ਕ ਐੱਸ. ਐੱਸ. ਰਾਜਾਮੌਲੀ ਦੀ ਵੱਡੀ ਫਿਲਮ ‘Varanasi’ ਨਾਲ ਵਾਪਸੀ ਕਰ ਰਹੀ ਹੈ, ਜਿਸ ਵਿੱਚ ਉਨ੍ਹਾਂ ਨਾਲ ਮਹੇਸ਼ ਬਾਬੂ ਅਤੇ ਪ੍ਰਿਥਵੀਰਾਜ ਸੁਕੁਮਾਰਨ ਮੁੱਖ ਭੂਮਿਕਾਵਾਂ ਵਿੱਚ ਹਨ। ਪ੍ਰਿਯੰਕਾ ਲਗਾਤਾਰ ਗਲੋਬਲ ਪੱਧਰ ‘ਤੇ ਭਾਰਤ ਦਾ ਨਾਂ ਰੋਸ਼ਨ ਕਰ ਰਹੀ ਹੈ।
