ਅਜਗਰ ਦੇ ਖ਼ੂਨ ਵਿੱਚ ਨਵੀਂ ਖੋਜ
ਵਿਗਿਆਨੀਆਂ ਨੇ ਅਜਗਰ ਦੇ ਖ਼ੂਨ ਵਿੱਚ ਇੱਕ ਅਜਿਹਾ ਤੱਤ ਲੱਭਿਆ ਹੈ ਜੋ ਭਵਿੱਖ ਵਿੱਚ ਮਨੁੱਖਾਂ ਵਿੱਚ ਵਧੇ ਹੋਏ ਵਜ਼ਨ ਅਤੇ ਚਰਬੀ ਘਟਾਉਣ ਲਈ ਮਦਦਗਾਰ ਹੋ ਸਕਦਾ ਹੈ।
ਅਜਗਰ ਇੱਕ ਅਜਿਹਾ ਸੱਪ ਹੈ ਜੋ ਆਪਣੀ ਹੀ ਬਾਡੀ ਦੇ ਬਰਾਬਰ ਦਾ ਸ਼ਿਕਾਰ ਖਾ ਸਕਦਾ ਹੈ ਅਤੇ ਫਿਰ ਕਈ ਮਹੀਨਿਆਂ ਤੱਕ ਬਿਨਾਂ ਖਾਧੇ ਜੀ ਸਕਦਾ ਹੈ। ਇਸ ਦੌਰਾਨ ਵੀ ਉਸਦੀ ਤਾਕਤ ਅਤੇ ਮਾਸਪੇਸ਼ੀਆਂ ’ਤੇ ਕੋਈ ਵੱਡਾ ਅਸਰ ਨਹੀਂ ਪੈਂਦਾ।
ਖਾਸ ਮਾਲੀਕਿਊਲ ਦੀ ਪਛਾਣ
ਖੋਜ ਦੌਰਾਨ ਵਿਗਿਆਨੀਆਂ ਨੇ ਅਜਗਰ ਦੇ ਖ਼ੂਨ ਵਿੱਚ 200 ਤੋਂ ਵੱਧ ਰਸਾਇਣਕ ਤੱਤਾਂ ਦੀ ਪਛਾਣ ਕੀਤੀ। ਇਨ੍ਹਾਂ ਵਿੱਚੋਂ ਇੱਕ ਤੱਤ ਪੈਰਾ-ਟਾਇਰਾਮਿਨ-ਓ-ਸਲਫੇਟ (pTOS) ਸਭ ਤੋਂ ਵੱਧ ਪ੍ਰਭਾਵਸ਼ਾਲੀ ਨਜ਼ਰ ਆਇਆ।
ਇਹ ਤੱਤ ਖਾਣ ਤੋਂ ਬਾਅਦ ਅਜਗਰ ਦੇ ਖ਼ੂਨ ਵਿੱਚ ਬਹੁਤ ਵੱਧ ਮਾਤਰਾ ਵਿੱਚ ਵੱਧ ਜਾਂਦਾ ਹੈ ਅਤੇ ਭੁੱਖ ਨੂੰ ਨਿਯੰਤਰਿਤ ਕਰਨ ਵਿੱਚ ਭੂਮਿਕਾ ਨਿਭਾਉਂਦਾ ਹੈ।
ਪ੍ਰਯੋਗਾਂ ਵਿੱਚ ਮਿਲੇ ਹੈਰਾਨੀਜਨਕ ਨਤੀਜੇ
ਜਦੋਂ ਵਿਗਿਆਨੀਆਂ ਨੇ ਇਸ ਤੱਤ ਦਾ ਪ੍ਰਯੋਗ ਚੂਹਿਆਂ ’ਤੇ ਕੀਤਾ ਤਾਂ ਚੂਹਿਆਂ ਦੀ ਭੁੱਖ ਘਟ ਗਈ ਅਤੇ ਉਹ ਘੱਟ ਖਾਣ ਲੱਗੇ।
ਲਗਭਗ 28 ਦਿਨਾਂ ਵਿੱਚ ਚੂਹਿਆਂ ਦਾ ਵਜ਼ਨ ਕਰੀਬ 9 ਫ਼ੀਸਦੀ ਘਟ ਗਿਆ, ਜਿਸ ਨਾਲ ਇਹ ਸਾਬਤ ਹੋਇਆ ਕਿ ਇਹ ਤੱਤ ਵਜ਼ਨ ਘਟਾਉਣ ਵਿੱਚ ਮਦਦਗਾਰ ਹੋ ਸਕਦਾ ਹੈ।
ਭਵਿੱਖ ਵਿੱਚ ਬਣ ਸਕਦੀ ਹੈ ਨਵੀਂ ਦਵਾਈ
ਮੌਜੂਦਾ ਸਮੇਂ ਵਿੱਚ ਵਰਤੀਆਂ ਜਾਣ ਵਾਲੀਆਂ ਵਜ਼ਨ ਘਟਾਉਣ ਵਾਲੀਆਂ ਦਵਾਈਆਂ ਕਈ ਵਾਰ ਸਾਈਡ ਇਫੈਕਟ ਪੈਦਾ ਕਰਦੀਆਂ ਹਨ।
ਵਿਗਿਆਨੀਆਂ ਦਾ ਮੰਨਣਾ ਹੈ ਕਿ ਅਜਗਰ ਦੇ ਖ਼ੂਨ ਤੋਂ ਮਿਲਿਆ ਇਹ ਤੱਤ ਭੁੱਖ ਨੂੰ ਸਿੱਧਾ ਦਿਮਾਗ ਦੇ ਉਸ ਹਿੱਸੇ ’ਤੇ ਪ੍ਰਭਾਵ ਪਾ ਕੇ ਘਟਾਉਂਦਾ ਹੈ ਜੋ ਭੁੱਖ ਨੂੰ ਨਿਯੰਤਰਿਤ ਕਰਦਾ ਹੈ।
ਮਨੁੱਖਾਂ ’ਤੇ ਹੋਵੇਗੀ ਅਗਲੀ ਖੋਜ
ਹਾਲਾਂਕਿ ਇਹ ਖੋਜ ਅਜੇ ਸ਼ੁਰੂਆਤੀ ਪੜਾਅ ’ਚ ਹੈ। ਵਿਗਿਆਨੀ ਅਗਲੇ ਪੜਾਅ ਵਿੱਚ ਮਨੁੱਖਾਂ ’ਤੇ ਇਸ ਦੇ ਪ੍ਰਭਾਵਾਂ ਦੀ ਜਾਂਚ ਕਰਨ ਦੀ ਯੋਜਨਾ ਬਣਾ ਰਹੇ ਹਨ।
ਜੇ ਇਹ ਖੋਜ ਸਫਲ ਰਹੀ ਤਾਂ ਭਵਿੱਖ ਵਿੱਚ ਅਜਗਰ ਦੇ ਖ਼ੂਨ ਤੋਂ ਪ੍ਰੇਰਿਤ ਨਵੀਆਂ ਦਵਾਈਆਂ ਤਿਆਰ ਹੋ ਸਕਦੀਆਂ ਹਨ ਜੋ ਮੋਟਾਪੇ ਦੇ ਇਲਾਜ ਵਿੱਚ ਮਦਦਗਾਰ ਹੋਣਗੀਆਂ।
