ਜੇਕਰ ਤੁਸੀਂ 2026 ਵਿੱਚ ਨਵਾਂ ਸਮਾਰਟਫੋਨ, ਲੈਪਟਾਪ ਜਾਂ PC ਖਰੀਦਣ ਦੀ ਯੋਜਨਾ ਬਣਾ ਰਹੇ ਹੋ, ਤਾਂ ਤੁਹਾਨੂੰ ਵਧੇਰੇ ਖਰਚੇ ਲਈ ਤਿਆਰ ਰਹਿਣਾ ਪੈ ਸਕਦਾ ਹੈ। ਇਸ ਦਾ ਮੁੱਖ ਕਾਰਨ RAM ਦੀਆਂ ਵਧਦੀਆਂ ਕੀਮਤਾਂ ਹਨ, ਜੋ ਪਹਿਲਾਂ ਸਭ ਤੋਂ ਸਸਤੀਆਂ ਮੰਨੀਆਂ ਜਾਂਦੀਆਂ ਸਨ। RAM ਦੀਆਂ ਕੀਮਤਾਂ ਵਿੱਚ ਤੇਜ਼ੀ ਨਾਲ ਵਾਧਾ ਹੋ ਰਿਹਾ ਹੈ, ਜਿਸ ਦਾ ਅਸਰ ਲਗਭਗ ਹਰ ਡਿਜੀਟਲ ਡਿਵਾਈਸ ‘ਤੇ ਪਵੇਗਾ।
RAM ਦੀਆਂ ਕੀਮਤਾਂ ਵਿੱਚ ਵਾਧੇ ਦਾ ਕਾਰਨ
ਅਕਤੂਬਰ 2025 ਤੋਂ ਬਾਅਦ RAM ਦੀਆਂ ਕੀਮਤਾਂ ਦੁੱਗਣੀਆਂ ਤੋਂ ਵੀ ਵੱਧ ਹੋ ਚੁੱਕੀਆਂ ਹਨ। ਕਈ ਮਾਮਲਿਆਂ ਵਿੱਚ ਤਾਂ ਕੰਪਨੀਆਂ ਨੂੰ ਪਹਿਲਾਂ ਨਾਲੋਂ 4 ਤੋਂ 5 ਗੁਣਾ ਵੱਧ ਦਰਾਂ ਦੱਸੀਆਂ ਜਾ ਰਹੀਆਂ ਹਨ। ਇਹ ਉਛਾਲ ਕਈ ਕਾਰਕਾਂ ਦੇ ਸੁਮੇਲ ਕਾਰਨ ਹੋਇਆ ਹੈ, ਜਿਨ੍ਹਾਂ ਵਿੱਚੋਂ ਸਭ ਤੋਂ ਵੱਡਾ ਕਾਰਨ AI ਤਕਨਾਲੋਜੀ ਦਾ ਤੇਜ਼ੀ ਨਾਲ ਫੈਲਣਾ ਹੈ। AI ਨੂੰ ਚਲਾਉਣ ਲਈ ਵੱਡੇ ਡੇਟਾ ਸੈਂਟਰ ਬਣਾਏ ਜਾ ਰਹੇ ਹਨ। ਇਹ ਡੇਟਾ ਸੈਂਟਰ ਉੱਚ-ਪ੍ਰਦਰਸ਼ਨ ਵਾਲੇ ਸਰਵਰਾਂ ਅਤੇ ਖਾਸ ਕਿਸਮ ਦੀ ਮੈਮੋਰੀ ‘ਤੇ ਨਿਰਭਰ ਕਰਦੇ ਹਨ, ਜਿਸ ਵਿੱਚ RAM ਦੀ ਬਹੁਤ ਜ਼ਿਆਦਾ ਖਪਤ ਹੁੰਦੀ ਹੈ। ਜਿਵੇਂ-ਜਿਵੇਂ AI ਦੀ ਵਰਤੋਂ ਵਧੀ, ਉਸੇ ਤਰ੍ਹਾਂ RAM ਦੀ ਮੰਗ ਵੀ ਅਸਮਾਨ ਛੂਹਣ ਲੱਗੀ, ਪਰ ਸਪਲਾਈ ਉਸ ਤੇਜ਼ੀ ਨਾਲ ਨਹੀਂ ਵਧ ਸਕੀ, ਜਿਸ ਕਾਰਨ ਮੰਗ ਅਤੇ ਸਪਲਾਈ ਵਿੱਚ ਵੱਡਾ ਅੰਤਰ ਪੈਦਾ ਹੋ ਗਿਆ ਅਤੇ ਕੀਮਤਾਂ ਲਗਾਤਾਰ ਵਧਦੀਆਂ ਰਹੀਆਂ।
ਉਪਭੋਗਤਾਵਾਂ ‘ਤੇ ਅਸਰ ਅਤੇ ਭਵਿੱਖ ਦੀਆਂ ਸੰਭਾਵਨਾਵਾਂ
BBC ਦੀ ਰਿਪੋਰਟ ਅਨੁਸਾਰ, ਆਮ ਤੌਰ ‘ਤੇ ਟੈਕ ਕੰਪਨੀਆਂ ਛੋਟੇ-ਮੋਟੇ ਖਰਚੇ ਖੁਦ ਹੀ ਝੱਲ ਲੈਂਦੀਆਂ ਹਨ ਤਾਂ ਜੋ ਗਾਹਕਾਂ ‘ਤੇ ਅਸਰ ਨਾ ਪਵੇ। ਪਰ ਜਦੋਂ ਲਾਗਤ ਵਿੱਚ ਵਾਧਾ ਬਹੁਤ ਜ਼ਿਆਦਾ ਹੋ ਜਾਵੇ ਤਾਂ ਉਸ ਦਾ ਬੋਝ ਆਖਰਕਾਰ ਗਾਹਕ ਤੱਕ ਪਹੁੰਚਦਾ ਹੀ ਹੈ। ਕੰਪਿਊਟਰ ਬਣਾਉਣ ਵਾਲੀਆਂ ਕਈ ਕੰਪਨੀਆਂ ਦਾ ਕਹਿਣਾ ਹੈ ਕਿ ਮੌਜੂਦਾ ਹਾਲਾਤ ਵਿੱਚ ਕੀਮਤਾਂ ਨਾ ਵਧਾਉਣਾ ਲਗਭਗ ਅਸੰਭਵ ਹੋ ਜਾਵੇਗਾ। ਇੱਕ PC ਨਿਰਮਾਤਾ ਦੇ ਅਨੁਸਾਰ, ਉਨ੍ਹਾਂ ਨੂੰ ਕੁਝ RAM ਕੰਪੋਨੈਂਟਸ ਲਈ ਹਾਲ ਹੀ ਵਿੱਚ 500% ਤੱਕ ਜ਼ਿਆਦਾ ਕੀਮਤਾਂ ਕੋਟ ਕੀਤੀਆਂ ਗਈਆਂ ਹਨ। RAM ਦੀ ਵਰਤੋਂ ਸਮਾਰਟਫੋਨ, ਲੈਪਟਾਪ, ਡੈਸਕਟਾਪ, ਸਮਾਰਟ ਟੀਵੀ ਅਤੇ ਮੈਡੀਕਲ ਡਿਵਾਈਸਾਂ ਸਮੇਤ ਲਗਭਗ ਹਰ ਇਲੈਕਟ੍ਰਾਨਿਕ ਡਿਵਾਈਸ ਵਿੱਚ ਹੁੰਦੀ ਹੈ, ਇਸ ਲਈ ਜੇਕਰ ਮੈਮੋਰੀ ਮਹਿੰਗੀ ਹੁੰਦੀ ਹੈ ਤਾਂ ਇਸ ਦਾ ਅਸਰ ਪੂਰੇ ਟੈਕ ਮਾਰਕੀਟ ‘ਤੇ ਦਿਖਾਈ ਦੇਵੇਗਾ।
ਟੈਕ ਇੰਡਸਟਰੀ ਦੇ ਮਾਹਿਰਾਂ ਦਾ ਮੰਨਣਾ ਹੈ ਕਿ RAM ਦੀਆਂ ਕੀਮਤਾਂ ਵਿੱਚ ਇਹ ਤੇਜ਼ੀ 2026 ਤੱਕ ਬਣੀ ਰਹਿ ਸਕਦੀ ਹੈ, ਅਤੇ 2027 ਤੱਕ ਵੀ ਹਾਲਾਤ ਚੁਣੌਤੀਪੂਰਨ ਰਹਿਣਗੇ। AI ਲਈ ਵਰਤੀ ਜਾਣ ਵਾਲੀ ਉੱਚ-ਪੱਧਰੀ ਮੈਮੋਰੀ ਨੇ ਪੂਰੇ ਬਾਜ਼ਾਰ ਨੂੰ ਪ੍ਰਭਾਵਿਤ ਕੀਤਾ ਹੈ, ਜਿਸ ਨਾਲ ਆਮ ਉਪਭੋਗਤਾਵਾਂ ਲਈ ਵਰਤੀ ਜਾਣ ਵਾਲੀ RAM ਵੀ ਮਹਿੰਗੀ ਹੋ ਗਈ ਹੈ। ਇੱਕ ਆਮ ਲੈਪਟਾਪ ਜਿਸ ਵਿੱਚ 16GB RAM ਹੁੰਦੀ ਹੈ, ਉਸ ਦੀ ਨਿਰਮਾਣ ਲਾਗਤ 2026 ਵਿੱਚ 40 ਤੋਂ 50 ਡਾਲਰ ਤੱਕ ਵਧ ਸਕਦੀ ਹੈ। ਸਮਾਰਟਫੋਨ ਦੀ ਗੱਲ ਕਰੀਏ ਤਾਂ ਇੱਕ ਫੋਨ ਦੀ ਲਾਗਤ ਵਿੱਚ ਕਰੀਬ 30 ਡਾਲਰ ਦਾ ਵਾਧਾ ਹੋ ਸਕਦਾ ਹੈ। ਇਹ ਵਾਧਾ ਸਿੱਧੇ ਤੌਰ ‘ਤੇ ਗਾਹਕਾਂ ਤੋਂ ਹੀ ਵਸੂਲਿਆ ਜਾਵੇਗਾ।
