ਭਾਰਤੀ ਫੂਡ ਡਿਲੀਵਰੀ ਕੰਪਨੀ ਜੋਮੈਟੋ ਦੀ ਮੂਲ ਕੰਪਨੀ ਇਟਰਨਲ ਦੇ ਸੰਸਥਾਪਕ ਦੀਪਇੰਦਰ ਗੋਇਲ ਨੇ ਗਰੁੱਪ ਸੀ.ਈ.ਓ. ਦੇ ਅਹੁਦੇ ਤੋਂ ਹਟਣ ਦਾ ਫੈਸਲਾ ਕੀਤਾ ਹੈ। ਕੰਪਨੀ ਨੇ ਬੁੱਧਵਾਰ, 21 ਜਨਵਰੀ ਨੂੰ ਸਟਾਕ ਐਕਸਚੇਂਜ ਨੂੰ ਇਸ ਬਾਰੇ ਜਾਣਕਾਰੀ ਦਿੱਤੀ। ਉਨ੍ਹਾਂ ਦੀ ਥਾਂ ਹੁਣ ਬਲਿੰਕਿਟ ਦੇ ਸੀ.ਈ.ਓ. ਅਲਬਿੰਦਰ ਢੀਂਡਸਾ ਨਵੇਂ ਗਰੁੱਪ ਸੀ.ਈ.ਓ. ਵਜੋਂ ਕੰਮ ਸੰਭਾਲਣਗੇ।
ਦੀਪਇੰਦਰ ਗੋਇਲ ਦੇ ਅਹੁਦਾ ਛੱਡਣ ਦਾ ਕਾਰਨ
ਦੀਪਇੰਦਰ ਗੋਇਲ ਨੇ ਦੱਸਿਆ ਕਿ ਉਹ ਅਜਿਹੇ ਨਵੇਂ ਵਿਚਾਰਾਂ ‘ਤੇ ਕੰਮ ਕਰਨਾ ਚਾਹੁੰਦੇ ਹਨ ਜਿਨ੍ਹਾਂ ਵਿੱਚ ਵੱਧ ਜੋਖਮ ਅਤੇ ਬਹੁਤ ਸਾਰੇ ਪ੍ਰਯੋਗ ਦੀ ਲੋੜ ਹੁੰਦੀ ਹੈ। ਉਨ੍ਹਾਂ ਅਨੁਸਾਰ ਅਜਿਹੇ ਵਿਚਾਰਾਂ ‘ਤੇ ਇਟਰਨਲ ਵਰਗੀ ਜਨਤਕ ਤੌਰ ‘ਤੇ ਸੂਚੀਬੱਧ ਕੰਪਨੀ ਦੇ ਦਾਇਰੇ ਤੋਂ ਬਾਹਰ ਰਹਿ ਕੇ ਕੰਮ ਕਰਨਾ ਬਿਹਤਰ ਹੈ। ਦੀਪਇੰਦਰ ਗੋਇਲ ਹੁਣ ਕੰਪਨੀ ਦੇ ਬੋਰਡ ਵਿੱਚ ਵਾਈਸ ਚੇਅਰਮੈਨ ਦੀ ਭੂਮਿਕਾ ਨਿਭਾਉਣਗੇ। ਉਨ੍ਹਾਂ ਨੇ ਕਿਹਾ ਕਿ ਉਹ ਲੰਬੀ ਮਿਆਦ ਦੀ ਰਣਨੀਤੀ, ਕੰਪਨੀ ਦੇ ਸੱਭਿਆਚਾਰ ਅਤੇ ਲੀਡਰਸ਼ਿਪ ਵਿਕਾਸ ਨਾਲ ਜੁੜੇ ਰਹਿਣਗੇ। ਉਹ ਇਟਰਨਲ ਤੋਂ ਬਾਹਰ ਸਪੇਸ-ਟੈਕ, ਸਿਹਤ ਅਤੇ ਹਵਾਬਾਜ਼ੀ ਖੇਤਰਾਂ ਵਿੱਚ ਵੀ ਨਿਵੇਸ਼ ਕਰ ਰਹੇ ਹਨ।
ਅਲਬਿੰਦਰ ਢੀਂਡਸਾ ‘ਤੇ ਭਰੋਸਾ ਅਤੇ ਭਵਿੱਖ ਦੀਆਂ ਯੋਜਨਾਵਾਂ
ਗੋਇਲ ਨੇ ਅਲਬਿੰਦਰ ਢੀਂਡਸਾ ਦੀ ਪ੍ਰਸ਼ੰਸਾ ਕਰਦਿਆਂ ਕਿਹਾ ਕਿ ਬਲਿੰਕਿਟ ਨੂੰ ਘਾਟੇ ਤੋਂ ਉਭਾਰਨ ਅਤੇ ਇਸਨੂੰ ਸਫਲ ਬਣਾਉਣ ਪਿੱਛੇ ਢੀਂਡਸਾ ਦੀ ਮਿਹਨਤ ਹੈ। ਉਨ੍ਹਾਂ ਨੇ ਢੀਂਡਸਾ ਨੂੰ ਇੱਕ ਤਜਰਬੇਕਾਰ ਸੰਸਥਾਪਕ ਦਾ ਡੀ.ਐਨ.ਏ. ਵਾਲਾ ਵਿਅਕਤੀ ਦੱਸਿਆ। ਕੰਪਨੀ ਦੇ ਭਵਿੱਖ ਅਤੇ ਸ਼ੇਅਰਧਾਰਕਾਂ ਦੇ ਭਰੋਸੇ ਨੂੰ ਬਣਾਈ ਰੱਖਣ ਲਈ, ਗੋਇਲ ਨੇ ਆਪਣੇ ਸਾਰੇ ਅਨਵੈਸਟਡ ਈ.ਐਸ.ਓ.ਪੀ.ਐੱਸ. ਕੰਪਨੀ ਦੇ ਪੂਲ ਵਿੱਚ ਵਾਪਸ ਕਰ ਦਿੱਤੇ ਹਨ। ਉਨ੍ਹਾਂ ਨੇ ਭਰੋਸਾ ਦਿਵਾਇਆ ਕਿ ਇਟਰਨਲ ਦੇ ਕੰਮਕਾਜ ਦੇ ਤਰੀਕੇ ਵਿੱਚ ਕੋਈ ਬਦਲਾਅ ਨਹੀਂ ਆਵੇਗਾ ਕਿਉਂਕੰਪਨੀ ਪਹਿਲਾਂ ਹੀ ਵਿਕੇਂਦਰੀਕ੍ਰਿਤ ਢਾਂਚੇ ‘ਤੇ ਕੰਮ ਕਰਦੀ ਹੈ। ਅਲਬਿੰਦਰ ਦੇ ਗਰੁੱਪ ਸੀ.ਈ.ਓ. ਬਣਨ ਤੋਂ ਬਾਅਦ ਵੀ, ਬਲਿੰਕਿਟ ਗਰੁੱਪ ਦੀ ਸਭ ਤੋਂ ਵੱਡੀ ਤਰਜੀਹ ਬਣੀ ਰਹੇਗੀ।
