ਗੁਜਰਾਤ ਦੇ ਰਾਜਕੋਟ ਜ਼ਿਲ੍ਹੇ ਵਿੱਚ ਪਿਛਲੇ 24 ਘੰਟਿਆਂ ਦੌਰਾਨ ਭੁਚਾਲ ਦੇ ਕੁੱਲ 7 ਝਟਕੇ ਮਹਿਸੂਸ ਕੀਤੇ ਗਏ ਹਨ। ਇਹ ਝਟਕੇ ਹਲਕੇ ਸਨ, ਜਿਸ ਕਾਰਨ ਕਿਸੇ ਵੀ ਕਿਸਮ ਦੇ ਜਾਨੀ ਜਾਂ ਮਾਲੀ ਨੁਕਸਾਨ ਦੀ ਕੋਈ ਖ਼ਬਰ ਨਹੀਂ ਹੈ। ਸੈਂਟਰ ਫਾਰ ਸੀਸਮੋਲੋਜੀ ਅਨੁਸਾਰ, ਇਨ੍ਹਾਂ ਭੁਚਾਲ ਦੇ ਝਟਕਿਆਂ ਦੀ ਤੀਬਰਤਾ ਰਿਕਟਰ ਪੈਮਾਨੇ ‘ਤੇ 2.7 ਤੋਂ 3.8 ਦੇ ਵਿਚਕਾਰ ਦਰਜ ਕੀਤੀ ਗਈ ਹੈ।
ਇਹਤਿਆਤ ਵਜੋਂ, ਰਾਜਕੋਟ ਦੇ ਆਸ-ਪਾਸ ਦੇ ਸਕੂਲਾਂ ਵਿੱਚ ਛੁੱਟੀ ਦਾ ਐਲਾਨ ਕਰ ਦਿੱਤਾ ਗਿਆ ਹੈ। ਅਧਿਕਾਰੀਆਂ ਨੇ ਦੱਸਿਆ ਕਿ ਭੁਚਾਲ ਦਾ ਕੇਂਦਰ ਉਪਲੇਟਾ ਤੋਂ 28 ਕਿਲੋਮੀਟਰ ਦੂਰ ਦਰਜ ਕੀਤਾ ਗਿਆ। ਲਗਾਤਾਰ ਆ ਰਹੇ ਝਟਕਿਆਂ ਕਾਰਨ ਲੋਕਾਂ ਵਿੱਚ ਵੱਡੇ ਭੁਚਾਲ ਦਾ ਡਰ ਵੱਧ ਗਿਆ ਹੈ।
ਸ਼ੁੱਕਰਵਾਰ ਸਵੇਰ ਦੇ ਝਟਕੇ
ਅਧਿਕਾਰੀਆਂ ਨੇ ਜਾਣਕਾਰੀ ਦਿੱਤੀ ਕਿ ਸ਼ੁੱਕਰਵਾਰ ਸਵੇਰੇ ਵੀ ਭੁਚਾਲ ਦੇ ਤਿੰਨ ਝਟਕੇ ਮਹਿਸੂਸ ਕੀਤੇ ਗਏ। ਪਹਿਲਾ ਝਟਕਾ ਸਵੇਰੇ 6:19 ਵਜੇ, ਦੂਜਾ ਝਟਕਾ 6:55 ਵਜੇ ਅਤੇ ਤੀਜਾ ਝਟਕਾ 6:58 ਵਜੇ ਆਇਆ। ਸਵੇਰੇ 6:19 ਵਜੇ ਆਏ ਭੁਚਾਲ ਦੀ ਤੀਬਰਤਾ 3.8 ਮੈਗਨੀਟਿਊਡ ਦਰਜ ਕੀਤੀ ਗਈ ਸੀ। ਇਸ ਤੋਂ ਪਹਿਲਾਂ, ਵੀਰਵਾਰ ਰਾਤ 8:43 ਵਜੇ ਵੀ ਇੱਕ ਝਟਕਾ ਮਹਿਸੂਸ ਕੀਤਾ ਗਿਆ ਸੀ।
ਭਾਰਤ ਦਾ ਨਵਾਂ ਭੁਚਾਲ ਜੋਖਮ ਨਕਸ਼ਾ
ਭਾਰਤ ਸਰਕਾਰ ਦੀ ਸੰਸਥਾ ਬਿਊਰੋ ਆਫ ਇੰਡੀਅਨ ਸਟੈਂਡਰਡਜ਼ (ਬੀ.ਆਈ.ਐੱਸ.) ਨੇ ਜਨਵਰੀ 2025 ਵਿੱਚ ਦੇਸ਼ ਦਾ ਨਵਾਂ ਭੁਚਾਲ ਜੋਖਮ ਨਕਸ਼ਾ ਜਾਰੀ ਕੀਤਾ ਸੀ। ਇਸ ਨਵੇਂ ਨਕਸ਼ੇ ਦੇ ਅਨੁਸਾਰ, ਭਾਰਤ ਦੀ 75% ਆਬਾਦੀ ਹੁਣ ਭੁਚਾਲ ਦੇ “ਖਤਰਨਾਕ ਖੇਤਰ” ਵਿੱਚ ਰਹਿ ਰਹੀ ਹੈ। ਇਸ ਦੇ ਨਾਲ ਹੀ, ਹਿਮਾਲੀਅਨ ਰੇਂਜ ਨੂੰ ਪੂਰੀ ਤਰ੍ਹਾਂ ਨਾਲ ਅਲਟਰਾ-ਹਾਈ ਰਿਸਕ ਜ਼ੋਨ (ਜ਼ੋਨ VI) ਵਿੱਚ ਰੱਖਿਆ ਗਿਆ ਹੈ।
ਵਿਗਿਆਨੀਆਂ ਦਾ ਕਹਿਣਾ ਹੈ ਕਿ ਹਿਮਾਲਿਆ ਦੇ ਹੇਠਾਂ ਵਾਲੀਆਂ ਟੈਕਟੋਨਿਕ ਪਲੇਟਾਂ ਲਗਭਗ 200 ਸਾਲਾਂ ਤੋਂ ਹਿੱਲੀਆਂ ਨਹੀਂ ਹਨ, ਜਿਸ ਕਾਰਨ ਉੱਥੇ ਭਾਰੀ ਤਣਾਅ ਜਮ੍ਹਾਂ ਹੋ ਗਿਆ ਹੈ ਅਤੇ ਕਿਸੇ ਵੀ ਸਮੇਂ ਬਹੁਤ ਸ਼ਕਤੀਸ਼ਾਲੀ ਭੁਚਾਲ ਆ ਸਕਦਾ ਹੈ। ਨਵੇਂ ਨਕਸ਼ੇ ਵਿੱਚ ਸਭ ਤੋਂ ਵੱਡਾ ਬਦਲਾਅ ਇਹ ਹੈ ਕਿ ਹੁਣ ਸਭ ਤੋਂ ਵੱਧ ਖਤਰੇ ਵਾਲੇ ਇਲਾਕੇ ਨੂੰ ਜ਼ੋਨ VI ਵਜੋਂ ਅਲਟਰਾ-ਹਾਈ ਰਿਸਕ ਮੰਨਿਆ ਗਿਆ ਹੈ। ਨਵੇਂ ਅੰਕੜਿਆਂ ਅਨੁਸਾਰ, ਦੇਸ਼ ਦਾ 61% ਖੇਤਰ ਮੱਧਮ ਤੋਂ ਭਾਰੀ ਖਤਰੇ ਵਾਲੇ ਜ਼ੋਨ ਵਿੱਚ ਆ ਗਿਆ ਹੈ।
