ਦੁਬਈ ਨੇ ਇੱਕ ਨਵੇਂ ਅਤੇ ਵਿਲੱਖਣ ਪ੍ਰੋਜੈਕਟ ਦਾ ਐਲਾਨ ਕੀਤਾ ਹੈ, ਜਿਸ ਵਿੱਚ ਦੁਨੀਆ ਦੀ ਪਹਿਲੀ ‘ਗੋਲਡ ਸਟ੍ਰੀਟ’ ਬਣਾਈ ਜਾਵੇਗੀ। ਇਹ ਪ੍ਰੋਜੈਕਟ ‘ਦੁਬਈ ਗੋਲਡ ਡਿਸਟ੍ਰਿਕਟ’ ਦਾ ਹਿੱਸਾ ਹੈ, ਜਿਸਨੂੰ ‘ਸੋਨੇ ਦਾ ਘਰ’ ਵੀ ਕਿਹਾ ਜਾ ਰਿਹਾ ਹੈ। ਇਸਦਾ ਮੁੱਖ ਉਦੇਸ਼ ਦੁਬਈ ਨੂੰ ਸੋਨੇ ਅਤੇ ਗਹਿਣਿਆਂ ਦੇ ਵਪਾਰ ਦਾ ਸਭ ਤੋਂ ਵੱਡਾ ਗਲੋਬਲ ਕੇਂਦਰ ਬਣਾਉਣਾ ਹੈ।
ਗੋਲਡ ਡਿਸਟ੍ਰਿਕਟ ਦੀਆਂ ਖਾਸ ਗੱਲਾਂ
ਇਹ ‘ਗੋਲਡ ਸਟ੍ਰੀਟ’ ਪੂਰੀ ਤਰ੍ਹਾਂ ਨਾਲ ਸੋਨੇ ਦੇ ਤੱਤਾਂ ਦੀ ਵਰਤੋਂ ਕਰਕੇ ਬਣਾਈ ਜਾਵੇਗੀ ਅਤੇ ਇਸਨੂੰ ਦੁਨੀਆ ਦੀ ਪਹਿਲੀ ਅਜਿਹੀ ਸੜਕ ਦੱਸਿਆ ਜਾ ਰਿਹਾ ਹੈ। ਇਹ ਦੁਬਈ ਦੇ ਡੇਰਾ ਖੇਤਰ ਵਿੱਚ ਸਥਾਪਿਤ ਕੀਤੀ ਜਾਵੇਗੀ, ਜੋ ਪਹਿਲਾਂ ਤੋਂ ਹੀ ‘ਗੋਲਡ ਸੂਕ’ ਲਈ ਪ੍ਰਸਿੱਧ ਹੈ। ਨਵੇਂ ਬਣ ਰਹੇ ਇਸ ਜ਼ਿਲ੍ਹੇ ਵਿੱਚ ਰਿਟੇਲ ਦੁਕਾਨਾਂ, ਥੋਕ ਵਪਾਰ, ਸੋਨੇ ਦੀਆਂ ਇੱਟਾਂ (ਬੁਲਿਅਨ), ਨਿਵੇਸ਼ ਅਤੇ ਗਹਿਣਿਆਂ ਨਾਲ ਸਬੰਧਤ ਸਾਰੀਆਂ ਚੀਜ਼ਾਂ ਇੱਕ ਥਾਂ ‘ਤੇ ਉਪਲਬਧ ਹੋਣਗੀਆਂ। ਅਧਿਕਾਰੀਆਂ ਨੂੰ ਉਮੀਦ ਹੈ ਕਿ ਇੱਥੇ ਘੱਟੋ-ਘੱਟ 1,000 ਤੋਂ ਵੱਧ ਰਿਟੇਲ ਸੋਨੇ ਦੀਆਂ ਦੁਕਾਨਾਂ ਹੋਣਗੀਆਂ, ਜੋ ਸੈਲਾਨੀਆਂ ਅਤੇ ਵਪਾਰੀਆਂ ਲਈ ਇੱਕ ਵੱਡਾ ਖਿੱਚ ਦਾ ਕੇਂਦਰ ਬਣਨਗੀਆਂ।
ਦੁਬਈ ਦੀ ਆਰਥਿਕਤਾ ਅਤੇ ਸੈਰ-ਸਪਾਟੇ ‘ਤੇ ਪ੍ਰਭਾਵ
ਇਹ ਪ੍ਰੋਜੈਕਟ ਇਥਰਾ ਦੁਬਈ ਦੁਆਰਾ ਸ਼ੁਰੂ ਕੀਤਾ ਗਿਆ ਹੈ, ਜੋ ਦੁਬਈ ਡਿਪਾਰਟਮੈਂਟ ਆਫ ਇਕਾਨੋਮੀ ਐਂਡ ਟੂਰਿਜ਼ਮ (DET) ਅਤੇ ਦੁਬਈ ਫੈਸਟੀਵਲਜ਼ ਐਂਡ ਰਿਟੇਲ ਐਸਟੈਬਲਿਸ਼ਮੈਂਟ (DFRE) ਦੇ ਅਧੀਨ ਕੰਮ ਕਰਦਾ ਹੈ। DFRE ਦੇ CEO ਅਹਿਮਦ ਅਲ ਖਾਜਾ ਨੇ ਕਿਹਾ ਕਿ ਸੋਨਾ ਦੁਬਈ ਦੀ ਸੰਸਕ੍ਰਿਤੀ ਅਤੇ ਵਪਾਰ ਦਾ ਇੱਕ ਅਨਿੱਖੜਵਾਂ ਅੰਗ ਹੈ। ਉਨ੍ਹਾਂ ਨੇ ਦੱਸਿਆ ਕਿ ਇਹ ਸਾਡੀ ਵਿਰਾਸਤ, ਖੁਸ਼ਹਾਲੀ ਅਤੇ ਵਪਾਰਕ ਭਾਵਨਾ ਦਾ ਪ੍ਰਤੀਕ ਹੈ। ਇੱਕ ਸੰਯੁਕਤ ਅਰਬ ਅਮੀਰਾਤ ਦੇ ਅਧਿਕਾਰੀ ਨੇ ਵੀ ਦੱਸਿਆ ਕਿ ਗੋਲਡ ਡਿਸਟ੍ਰਿਕਟ ਅਤੇ ਗੋਲਡ ਸਟ੍ਰੀਟ ਦੁਬਈ ਨੂੰ ਸੋਨੇ ਦੇ ਇੱਕ ਗਲੋਬਲ ਕੇਂਦਰ ਵਜੋਂ ਹੋਰ ਮਜ਼ਬੂਤ ਕਰਨਗੇ। ਦੁਬਈ ਸਰਕਾਰ ਨੇ ਇਸ ਪ੍ਰੋਜੈਕਟ ਦਾ ਪਹਿਲਾ ਵੀਡੀਓ ਜਾਰੀ ਕਰ ਦਿੱਤਾ ਹੈ, ਜਿਸ ਨਾਲ ਲੋਕਾਂ ਵਿੱਚ ਕਾਫੀ ਉਤਸ਼ਾਹ ਹੈ। ਇਹ ਨਵਾਂ ਪ੍ਰੋਜੈਕਟ ਨਾ ਸਿਰਫ਼ ਵਪਾਰ ਨੂੰ ਵਧਾਏਗਾ, ਬਲਕਿ ਸੈਰ-ਸਪਾਟੇ ਨੂੰ ਵੀ ਨਵੀਆਂ ਉਚਾਈਆਂ ‘ਤੇ ਲੈ ਜਾਵੇਗਾ। ਦੁਨੀਆ ਭਰ ਦੇ ਲੋਕ ਹੁਣ ਦੁਬਈ ਵਿੱਚ ਸੋਨੇ ਦੀ ਗਲੀ ‘ਤੇ ਚੱਲਣ ਦਾ ਇੰਤਜ਼ਾਰ ਕਰ ਰਹੇ ਹਨ।
