ਸ੍ਰੀ ਵੈਂਕਟੇਸ਼ਵਰ ਸੁਆਮੀ ਮੰਦਰ ਵਿਖੇ ਅਧਿਆਤਮਿਕ ਫੇਰੀ
ਰਿਲਾਇੰਸ ਇੰਡਸਟਰੀਜ਼ ਦੇ ਕਾਰਜਕਾਰੀ ਨਿਰਦੇਸ਼ਕ ਅਤੇ ਅਰਬਪਤੀ ਮੁਕੇਸ਼ ਅੰਬਾਨੀ ਦੇ ਛੋਟੇ ਬੇਟੇ ਅਨੰਤ ਅੰਬਾਨੀ ਆਂਧਰਾ ਪ੍ਰਦੇਸ਼ ਦੇ ਤਿਰੂਪਤੀ ਵਿੱਚ ਸਥਿਤ ਪਵਿੱਤਰ ਤਿਰੂਮਾਲਾ ਸ੍ਰੀ ਵੈਂਕਟੇਸ਼ਵਰ ਸੁਆਮੀ ਮੰਦਰ ਵਿੱਚ ਨਤਮਸਤਕ ਹੋਏ। ਐਤਵਾਰ ਤੜਕੇ ਕਰੀਬ 1:00 ਵਜੇ ਪਵਿੱਤਰ ਪਹਾੜੀ ਉੱਤੇ ਸਥਿਤ ਇਸ ਮੰਦਰ ਵਿੱਚ ਪਹੁੰਚ ਕੇ ਅਨੰਤ ਅੰਬਾਨੀ ਨੇ ਭਗਵਾਨ ਨੂੰ ਜਗਾਉਣ ਲਈ ਕੀਤੀ ਜਾਣ ਵਾਲੀ ਰਵਾਇਤੀ ਆਰਤੀ ਸੁਪ੍ਰਭਾਤ ਸੇਵਾ ਵਿੱਚ ਹਿੱਸਾ ਲਿਆ। ਇੱਕ ਸਾਧਾਰਨ ਰਵਾਇਤੀ ਪਹਿਰਾਵੇ—ਚਿੱਟੀ ਵੇਸ਼ਟੀ ਅਤੇ ਅੰਗਵਸਤਰਮ ਵਿੱਚ ਸਜੇ ਇਸ ਨੌਜਵਾਨ ਕਾਰੋਬਾਰੀ ਨੇ ਕਾਰਪੋਰੇਟ ਚਮਕ-ਦਮਕ ਤੋਂ ਦੂਰ ਰਹਿ ਕੇ ਘੰਟਿਆਂ ਬੱਧੀ ਸ਼ਾਂਤਮਈ ਪ੍ਰਾਰਥਨਾ ਕੀਤੀ।
ਕੇਸ ਦਾਨ ਕਰਨ ਦੀ ਪਵਿੱਤਰ ਰਸਮ ਕੀਤੀ ਪੂਰੀ
ਅਨੰਤ ਅੰਬਾਨੀ ਦੀ ਇਸ ਯਾਤਰਾ ਦੀ ਸਭ ਤੋਂ ਖਾਸ ਗੱਲ ਜਿਸ ਨੇ ਲੋਕਾਂ ਦਾ ਧਿਆਨ ਖਿੱਚਿਆ, ਉਹ ਸੀ ਮੰਦਰ ਦੀ ਸਦੀਆਂ ਪੁਰਾਣੀ ਮੁੰਡਨ (ਕੇਸ ਦਾਨ) ਦੀ ਰਸਮ ਵਿੱਚ ਉਨ੍ਹਾਂ ਦੀ ਸ਼ਮੂਲੀਅਤ। ਉਨ੍ਹਾਂ ਨੇ ਖੁਸ਼ੀ-ਖੁਸ਼ੀ ਆਪਣੇ ਕੇਸ ਭਗਵਾਨ ਵੈਂਕਟੇਸ਼ਵਰ ਦੇ ਚਰਨਾਂ ਵਿੱਚ ਅਰਪਿਤ ਕਰ ਦਿੱਤੇ। ਹਾਲ ਹੀ ਦੇ ਸਾਲਾਂ ਵਿੱਚ ਜਨਤਕ ਪ੍ਰੋਗਰਾਮਾਂ ਦੌਰਾਨ ਅਨੰਤ ਦੇ ਲੰਬੇ ਕੇਸ ਉਨ੍ਹਾਂ ਦੀ ਇੱਕ ਵਿਲੱਖਣ ਪਛਾਣ ਬਣ ਚੁੱਕੇ ਸਨ। ਆਪਣੀ ਦਿੱਖ ਦੇ ਇਸ ਮਹੱਤਵਪੂਰਨ ਹਿੱਸੇ ਨੂੰ ਤਿਆਗ ਕੇ ਅਨੰਤ ਨੇ ਲੱਖਾਂ ਆਮ ਸ਼ਰਧਾਲੂਆਂ ਵਾਂਗ ਸਦੀਆਂ ਪੁਰਾਣੀ ਪਰੰਪਰਾ ਦਾ ਪਾਲਣ ਕਰਦਿਆਂ ਵੈਦਿਕ ਰੀਤੀ-ਰਿਵਾਜਾਂ ਪ੍ਰਤੀ ਆਪਣੀ ਅਥਾਹ ਸ਼ਰਧਾ ਦਾ ਪ੍ਰਗਟਾਵਾ ਕੀਤਾ।
ਮਨੁੱਖੀ ਬਰਾਬਰੀ ਦਾ ਇੱਕ ਪ੍ਰਭਾਵਸ਼ਾਲੀ ਸੰਦੇਸ਼
ਤਿਰੂਮਾਲਾ ਮੰਦਰ ਵਿੱਚ ਕੇਸ ਦਾਨ ਕਰਨ ਦੀ ਰਸਮ ਆਰਥਿਕ ਅਤੇ ਸਮਾਜਿਕ ਵਖਰੇਵਿਆਂ ਤੋਂ ਉੱਪਰ ਉੱਠ ਕੇ ਇੱਕ ਡੂੰਘਾ ਪ੍ਰਤੀਕਾਤਮਕ ਅਰਥ ਰੱਖਦੀ ਹੈ। ਭਗਵਾਨ ਦੇ ਸਾਹਮਣੇ ਸਿਰ ਮੁੰਡਵਾਉਣਾ ਅਹੰਕਾਰ, ਹਉਮੈ ਅਤੇ ਦੁਨਿਆਵੀ ਸ਼ਾਨੋ-ਸ਼ੌਕਤ ਦੇ ਪੂਰਨ ਤਿਆਗ ਨੂੰ ਦਰਸਾਉਂਦਾ ਹੈ। ਅਜਿਹੇ ਸਮਾਜ ਵਿੱਚ ਜਿੱਥੇ ਅਕਸਰ ਅਮੀਰੀ-ਗਰੀਬੀ ਦਾ ਪਾੜਾ ਦੇਖਣ ਨੂੰ ਮਿਲਦਾ ਹੈ, ਉੱਥੇ ਭਾਰਤ ਦੇ ਸਭ ਤੋਂ ਅਮੀਰ ਪਰਿਵਾਰ ਦੇ ਇੱਕ ਮੈਂਬਰ ਵੱਲੋਂ ਹਜ਼ਾਰਾਂ ਆਮ ਸ਼ਰਧਾਲੂਆਂ ਦੇ ਨਾਲ ਬੈਠ ਕੇ ਮੁੰਡਨ ਕਰਵਾਉਣਾ ਆਪਸੀ ਬਰਾਬਰੀ ਦਾ ਇੱਕ ਬਹੁਤ ਵੱਡਾ ਸੰਦੇਸ਼ ਦਿੰਦਾ ਹੈ। ਰੱਬ ਦੇ ਦਰਬਾਰ ਵਿੱਚ ਦੁਨਿਆਵੀ ਦੌਲਤ ਕੋਈ ਮਾਇਨੇ ਨਹੀਂ ਰੱਖਦੀ।
ਮੰਦਰ ਦੇ ਹਾਥੀਆਂ ਨੂੰ ਚੋਗਾ ਪਾਇਆ ਅਤੇ ਗਊਸ਼ਾਲਾ ਵਿੱਚ ਕੀਤੀ ਪੂਜਾ
ਦਰਸ਼ਨ ਕਰਨ ਅਤੇ ਕੇਸ ਦਾਨ ਦੀ ਰਸਮ ਪੂਰੀ ਕਰਨ ਤੋਂ ਬਾਅਦ ਅਨੰਤ ਅੰਬਾਨੀ ਨੇ ਮੰਦਰ ਕੰਪਲੈਕਸ ਵਿੱਚ ਕਈ ਸੇਵਾ ਕਾਰਜਾਂ ਵਿੱਚ ਹਿੱਸਾ ਲਿਆ। ਆਪਣੇ ‘ਵਣਤਾਰਾ’ ਪ੍ਰੋਜੈਕਟ ਰਾਹੀਂ ਜੰਗਲੀ ਜੀਵਾਂ ਦੀ ਸੰਭਾਲ ਲਈ ਜਾਣੇ ਜਾਂਦੇ ਅਨੰਤ ਨੇ ਮੰਦਰ ਦੇ ਪਵਿੱਤਰ ਹਾਥੀਆਂ ਨੂੰ ਆਪਣੇ ਹੱਥੀਂ ਭੋਜਨ ਖੁਆਇਆ। ਇਸ ਤੋਂ ਬਾਅਦ ਉਨ੍ਹਾਂ ਨੇ ਮੰਦਰ ਦੀ ਗਊਸ਼ਾਲਾ ਦਾ ਦੌਰਾ ਕਰਕੇ ਗਊਆਂ ਦੀ ਪੂਜਾ ਅਤੇ ਸੇਵਾ ਕੀਤੀ। ਆਪਣੀ ਇਸ ਧਾਰਮਿਕ ਯਾਤਰਾ ਦੇ ਅਖੀਰ ਵਿੱਚ, ਉਨ੍ਹਾਂ ਨੇ ਤਿਰੂਪਤੀ ਵਿੱਚ ਸਥਿਤ ਸ੍ਰੀ ਪਦਮਾਵਤੀ ਅੰਮਾਵਾਰੀ ਮੰਦਰ ਵਿੱਚ ਜਾ ਕੇ ਵੀ ਆਸ਼ੀਰਵਾਦ ਲਿਆ।
ਅੰਬਾਨੀ ਪਰਿਵਾਰ ਦੀ ਪੁਰਾਣੀ ਪਰੰਪਰਾ ਨੂੰ ਰੱਖਿਆ ਬਰਕਰਾਰ
ਇਹ ਯਾਤਰਾ ਅੰਬਾਨੀ ਪਰਿਵਾਰ ਦੀ ਡੂੰਘੀ ਅਧਿਆਤਮਿਕ ਪਰੰਪਰਾ ਦਾ ਹਿੱਸਾ ਹੈ, ਜੋ ਅਕਸਰ ਭਾਰਤ ਦੇ ਪ੍ਰਮੁੱਖ ਹਿੰਦੂ ਤੀਰਥ ਅਸਥਾਨਾਂ ‘ਤੇ ਜਾਂਦੇ ਰਹਿੰਦੇ ਹਨ। ਕੁਝ ਹਫ਼ਤੇ ਪਹਿਲਾਂ ਹੀ ਅਨੰਤ ਆਪਣੇ ਪਿਤਾ ਮੁਕੇਸ਼ ਅੰਬਾਨੀ ਅਤੇ ਪਤਨੀ ਰਾਧਿਕਾ ਮਰਚੈਂਟ ਨਾਲ ਇਸੇ ਤਿਰੂਮਾਲਾ ਮੰਦਰ ਵਿੱਚ ਆਏ ਸਨ। ਗੁਜਰਾਤ ਦੇ ਦਵਾਰਕਾਧੀਸ਼ ਵਰਗੇ ਮੰਦਰਾਂ ਤੱਕ ਪੈਦਲ ਯਾਤਰਾ ਕਰਨ ਤੋਂ ਲੈ ਕੇ ਘਰ ਵਿੱਚ ਵੱਡੇ ਧਾਰਮਿਕ ਅਨੁਸ਼ਠਾਨ ਕਰਵਾਉਣ ਤੱਕ, ਅਨੰਤ ਦਾ ਇਹ ਕਦਮ ਸਿੱਧ ਕਰਦਾ ਹੈ ਕਿ ਉਹ ਬੇਅੰਤ ਦੌਲਤ ਦੇ ਬਾਵਜੂਦ ਆਪਣੀਆਂ ਰਵਾਇਤੀ ਕਦਰਾਂ-ਕੀਮਤਾਂ ਨਾਲ ਜੁੜੇ ਹੋਏ ਹਨ।
