ਭਾਰਤ ਅਤੇ ਯੂਰਪੀ ਸੰਘ ਵਿਚਾਲੇ ਇਤਿਹਾਸਕ ਸਮਝੌਤਾ
ਭਾਰਤ ਅਤੇ ਯੂਰਪੀ ਸੰਘ ਨੇ ਕਈ ਸਾਲਾਂ ਦੀ ਗੱਲਬਾਤ ਤੋਂ ਬਾਅਦ ਮੁਫ਼ਤ ਵਪਾਰ ਸਮਝੌਤਾ (FTA) ਅੰਤਿਮ ਰੂਪ ਵਿੱਚ ਤੈਅ ਕਰ ਲਿਆ ਹੈ। ਇਹ ਸਮਝੌਤਾ ਦੋਹਾਂ ਦੇਸ਼ਾਂ ਵਿਚਾਲੇ ਵਪਾਰਕ ਰਿਸ਼ਤਿਆਂ ਨੂੰ ਮਜ਼ਬੂਤ ਕਰਨ ਅਤੇ ਕਈ ਉਤਪਾਦਾਂ ‘ਤੇ ਆਯਾਤ ਡਿਊਟੀ ਘਟਾਉਣ ਵੱਲ ਇੱਕ ਵੱਡਾ ਕਦਮ ਮੰਨਿਆ ਜਾ ਰਿਹਾ ਹੈ।
ਸ਼ਰਾਬ ਅਤੇ ਪੇਅ ਪਦਾਰਥਾਂ ‘ਤੇ ਵੱਡੀ ਛੂਟ
ਇਸ ਸਮਝੌਤੇ ਤਹਿਤ ਯੂਰਪ ਤੋਂ ਆਉਣ ਵਾਲੀ ਸ਼ਰਾਬ ‘ਤੇ ਲੱਗਣ ਵਾਲੀ ਭਾਰੀ ਡਿਊਟੀ ਘਟਾਈ ਜਾਵੇਗੀ। ਬੀਅਰ ‘ਤੇ ਡਿਊਟੀ ਕਰੀਬ 50 ਫੀਸਦੀ ਤੱਕ ਲਿਆਂਦੀ ਜਾ ਸਕਦੀ ਹੈ, ਜਦਕਿ ਵਾਈਨ ‘ਤੇ 20 ਤੋਂ 30 ਫੀਸਦੀ ਤੱਕ ਡਿਊਟੀ ਹੋ ਸਕਦੀ ਹੈ।
ਇਸ ਨਾਲ ਯੂਰਪੀ ਸ਼ਰਾਬ ਭਾਰਤੀ ਬਾਜ਼ਾਰ ਵਿੱਚ ਹੋਰ ਸਸਤੀ ਅਤੇ ਆਸਾਨੀ ਨਾਲ ਉਪਲਬਧ ਹੋਵੇਗੀ।
ਪ੍ਰੋਸੈਸਡ ਖਾਦ ਉਤਪਾਦ ਹੋਣਗੇ ਸਸਤੇ
ਚਾਕਲੇਟ, ਬਿਸਕੁਟ, ਪਾਸਤਾ, ਰੋਟੀ ਅਤੇ ਹੋਰ ਪ੍ਰੋਸੈਸਡ ਖਾਦ ਪਦਾਰਥਾਂ ‘ਤੇ ਮੌਜੂਦਾ ਸਮੇਂ 50 ਫੀਸਦੀ ਤੱਕ ਡਿਊਟੀ ਲੱਗਦੀ ਹੈ। FTA ਦੇ ਤਹਿਤ ਇਹ ਡਿਊਟੀ ਹੌਲੀ-ਹੌਲੀ ਖਤਮ ਕੀਤੀ ਜਾਵੇਗੀ।
ਫਲਾਂ ਦੇ ਰਸ ਅਤੇ ਬਿਨਾ ਸ਼ਰਾਬ ਵਾਲੇ ਪੇਅ ਵੀ ਇਸ ਛੂਟ ਵਿੱਚ ਸ਼ਾਮਲ ਹਨ, ਜਿਸ ਨਾਲ ਖਪਤਕਾਰਾਂ ਨੂੰ ਵਧੇਰੇ ਚੋਣ ਅਤੇ ਘੱਟ ਕੀਮਤਾਂ ਮਿਲ ਸਕਦੀਆਂ ਹਨ।
ਰਸਾਇਣ ਅਤੇ ਉਦਯੋਗਿਕ ਖੇਤਰ ਨੂੰ ਫ਼ਾਇਦਾ
ਰਸਾਇਣਕ ਉਤਪਾਦਾਂ ‘ਤੇ ਡਿਊਟੀ ਘਟਾਉਣ ਨਾਲ ਭਾਰਤੀ ਉਦਯੋਗਾਂ ਨੂੰ ਉੱਚ ਗੁਣਵੱਤਾ ਵਾਲਾ ਕੱਚਾ ਮਾਲ ਸਸਤੇ ਦਰਾਂ ‘ਤੇ ਮਿਲ ਸਕੇਗਾ। ਇਸ ਨਾਲ ਉਤਪਾਦਨ ਲਾਗਤ ਘਟਣ ਅਤੇ ਨਿਰਯਾਤ ਵਿੱਚ ਵਾਧੇ ਦੀ ਉਮੀਦ ਹੈ।
ਗੱਡੀਆਂ ਅਤੇ ਮਸ਼ੀਨਰੀ ‘ਤੇ ਟੈਕਸ ਕਟੌਤੀ
ਯੂਰਪੀ ਕਾਰਾਂ ‘ਤੇ ਲੱਗਣ ਵਾਲੀ ਡਿਊਟੀ ਜੋ 100 ਫੀਸਦੀ ਤੋਂ ਵੀ ਵੱਧ ਹੈ, ਉਸਨੂੰ ਕਈ ਪੜਾਅਾਂ ਵਿੱਚ ਘਟਾਇਆ ਜਾਵੇਗਾ। ਮੈਡੀਕਲ ਉਪਕਰਨ ਅਤੇ ਮਸ਼ੀਨਰੀ ਵੀ ਇਸ ਸਮਝੌਤੇ ਤੋਂ ਲਾਭ ਪ੍ਰਾਪਤ ਕਰਨਗੇ।
