ਘੱਟ ਬਜਟ ਵਾਲੀ ਫਿਲਮ ਨੇ ਦੁਨੀਆ ਭਰ ਵਿੱਚ ਮਚਾਈ ਧੂਮ
ਹਾਲੀਵੁੱਡ ਦੀ ਹਾਰਰ ਫਿਲਮ ਓਬਸੈਸ਼ਨ 2026 ਦੀਆਂ ਸਭ ਤੋਂ ਚਰਚਿਤ ਫਿਲਮਾਂ ਵਿੱਚ ਸ਼ਾਮਲ ਹੋ ਗਈ ਹੈ। Curry Barker ਵੱਲੋਂ ਨਿਰਦੇਸ਼ਤ ਇਸ ਫਿਲਮ ਨੇ ਘੱਟ ਬਜਟ ਹੋਣ ਦੇ ਬਾਵਜੂਦ ਦੁਨੀਆ ਭਰ ਦੇ ਦਰਸ਼ਕਾਂ ਨੂੰ ਪ੍ਰਭਾਵਿਤ ਕੀਤਾ ਹੈ।
ਫਿਲਮ ਦੀ ਕਹਾਣੀ ਪਿਆਰ, ਜ਼ਿੱਦ ਅਤੇ ਇੱਕ ਖ਼ਤਰਨਾਕ ਇੱਛਾ ਦੇ ਨਤੀਜਿਆਂ ਦੇ ਆਲੇ-ਦੁਆਲੇ ਘੁੰਮਦੀ ਹੈ। ਮਨੋਵਿਗਿਆਨਕ ਡਰ, ਸਸਪੈਂਸ ਅਤੇ ਚੌਕਾਣ ਵਾਲੇ ਮੋੜਾਂ ਨੇ ਇਸ ਨੂੰ ਹਾਰਰ ਪ੍ਰੇਮੀਆਂ ਵਿੱਚ ਕਾਫ਼ੀ ਲੋਕਪ੍ਰਿਯ ਬਣਾ ਦਿੱਤਾ ਹੈ।
ਭਾਰਤ ਵਿੱਚ ਰਿਲੀਜ਼ ਤੋਂ ਪਹਿਲਾਂ CBFC ਨੇ ਲਗਾਈਆਂ ਕਟੌਤੀਆਂ
ਭਾਰਤ ਵਿੱਚ ਫਿਲਮ ਨੂੰ ‘ਏ’ ਸਰਟੀਫਿਕੇਟ ਮਿਲਿਆ, ਪਰ ਰਿਲੀਜ਼ ਤੋਂ ਪਹਿਲਾਂ CBFC ਨੇ ਕੁਝ ਤਬਦੀਲੀਆਂ ਕਰਨ ਦੇ ਨਿਰਦੇਸ਼ ਦਿੱਤੇ।ਸਰਟੀਫਿਕੇਸ਼ਨ ਵੇਰਵਿਆਂ ਮੁਤਾਬਕ 24 ਸਕਿੰਟ ਦੀ ਹਿੰਸਕ ਸਮੱਗਰੀ ਅਤੇ 14 ਸਕਿੰਟ ਦੇ ਗ੍ਰਾਫਿਕ ਸੈਕਸ ਸੀਨ ਹਟਾਏ ਗਏ। ਇਸ ਤੋਂ ਇਲਾਵਾ ਨਗਨਤਾ ਨਾਲ ਜੁੜਿਆ ਇੱਕ ਦ੍ਰਿਸ਼ ਵੀ ਹਟਾਇਆ ਜਾਂ ਬਦਲਿਆ ਗਿਆ। ਕੁੱਲ ਮਿਲਾ ਕੇ ਫਿਲਮ ਵਿੱਚੋਂ 38 ਸਕਿੰਟ ਦੀ ਫੁਟੇਜ ਕੱਟੀ ਗਈ।
ਦਰਸ਼ਕਾਂ ਨੇ ਉਠਾਏ ਸਵਾਲ
CBFC ਦੇ ਫੈਸਲੇ ਤੋਂ ਬਾਅਦ ਸੋਸ਼ਲ ਮੀਡੀਆ ‘ਤੇ ਵੱਡੀ ਚਰਚਾ ਸ਼ੁਰੂ ਹੋ ਗਈ। ਕਈ ਦਰਸ਼ਕਾਂ ਨੇ ਕਿਹਾ ਕਿ ਜੇਕਰ ਫਿਲਮ ਨੂੰ ਪਹਿਲਾਂ ਹੀ ਬਾਲਗਾਂ ਲਈ ਮਨਜ਼ੂਰੀ ਮਿਲੀ ਹੋਈ ਹੈ ਤਾਂ ਫਿਰ ਇੰਨੀ ਕਟੌਤੀ ਦੀ ਲੋੜ ਕਿਉਂ ਪਈ। ਦਰਸ਼ਕਾਂ ਦਾ ਮੰਨਣਾ ਹੈ ਕਿ ਹਟਾਏ ਗਏ ਕੁਝ ਦ੍ਰਿਸ਼ ਕਹਾਣੀ ਨੂੰ ਸਮਝਣ ਲਈ ਮਹੱਤਵਪੂਰਨ ਸਨ। ਉਨ੍ਹਾਂ ਦੇ ਅਨੁਸਾਰ ਕਟੌਤੀਆਂ ਕਾਰਨ ਕਈ ਘਟਨਾਵਾਂ ਦਾ ਸੰਦਰਭ ਕਮਜ਼ੋਰ ਹੋ ਗਿਆ।
ਸੰਜੇ ਗੁਪਤਾ ਦੀ ਟਿੱਪਣੀ ਨਾਲ ਵਧੀ ਬਹਿਸ
ਫਿਲਮ ਨਿਰਮਾਤਾ Sanjay Gupta ਨੇ ਵੀ ਇਸ ਮਾਮਲੇ ‘ਤੇ ਆਪਣੀ ਪ੍ਰਤੀਕਿਰਿਆ ਦਿੱਤੀ। ਉਨ੍ਹਾਂ ਨੇ ਦਾਅਵਾ ਕੀਤਾ ਕਿ ਏ-ਰੇਟਡ ਫਿਲਮ ਦੀ ਸਕ੍ਰੀਨਿੰਗ ਦੌਰਾਨ ਕਈ ਨਾਬਾਲਗ ਦਰਸ਼ਕ ਮੌਜੂਦ ਸਨ। ਉਨ੍ਹਾਂ ਦੀ ਟਿੱਪਣੀ ਤੋਂ ਬਾਅਦ ਫਿਲਮ ਸਰਟੀਫਿਕੇਸ਼ਨ, ਸਿਨੇਮਾ ਘਰਾਂ ਦੀ ਜ਼ਿੰਮੇਵਾਰੀ ਅਤੇ ਨਿਯਮਾਂ ਦੀ ਪਾਲਣਾ ਬਾਰੇ ਨਵੀਂ ਚਰਚਾ ਸ਼ੁਰੂ ਹੋ ਗਈ।
ਵਿਵਾਦ ਦੇ ਬਾਵਜੂਦ ਜਾਰੀ ਹੈ ਕਾਮਯਾਬੀ
ਵਿਵਾਦ ਦੇ ਬਾਵਜੂਦ ਓਬਸੈਸ਼ਨ ਦੀ ਲੋਕਪ੍ਰਿਯਤਾ ਘਟਣ ਦੀ ਬਜਾਏ ਵਧਦੀ ਨਜ਼ਰ ਆ ਰਹੀ ਹੈ। ਫਿਲਮ ਦੀ ਦਿਲਚਸਪ ਕਹਾਣੀ ਅਤੇ ਡਰਾਉਣਾ ਮਾਹੌਲ ਦਰਸ਼ਕਾਂ ਨੂੰ ਸਿਨੇਮਾਘਰਾਂ ਤੱਕ ਖਿੱਚ ਰਿਹਾ ਹੈ। ਹੁਣ ਕਈ ਦਰਸ਼ਕ ਇਸ ਦੇ ਅਣਕੱਟ ਵਰਜਨ ਦੀ OTT ਰਿਲੀਜ਼ ਦੀ ਉਡੀਕ ਕਰ ਰਹੇ ਹਨ ਤਾਂ ਜੋ ਉਹ ਪੂਰੀ ਫਿਲਮ ਦਾ ਅਨੁਭਵ ਕਰ ਸਕਣ।
